പത്തുമാസം കാത്തിരുന്നിട്ടും യുവാവിന് വധുവിനെ കണ്ടെത്തി നല്‍കിയില്ല; വിവാഹ ബ്യൂറോ 7000 രൂപ നഷ്ടപരിഹാരം നല്‍കണം

പാനൂര്‍: പത്തുമാസം കാത്തിരുന്നിട്ടും വധുവിനെ കണ്ടെത്തി നല്‍കാത്തതിന് വിവാഹ ബ്യൂറോ 7000 രൂപ നഷ്ടപരിഹാരം നല്‍കാന്‍ ഉത്തരവ്. കണ്ണൂര്‍ ഉപഭോക്തൃ തര്‍ക്കപരിഹാര ഫോറമാണ് തുക നല്‍കാന്‍ ഉത്തരവായത്. 5000 രൂപ നഷ്ടപരിഹാരവും, 2000 രൂപ കോടതി ചെലവും നല്‍കണം. 

കണ്ണൂര്‍ കക്കാട് റോഡിലെ വിവാഹവേദി എം.എസ്. സൊല്യൂഷന്‍ എന്ന സ്ഥാപനത്തിനെതിരെ പാനൂര്‍ പുത്തന്‍പുരയില്‍ വീട്ടില്‍ പി.കെ. സുമേഷാണ് പരാതി നല്‍കിയത്. 4,900 രൂപ രജിസ്‌ട്രേഷന്‍ ഫീസ് വാങ്ങി രണ്ടുമാസം കൊണ്ട് അനുയോജ്യമായ വധുവിനെ കണ്ടെത്തി നല്‍കുമെന്ന് വിവാഹബ്യൂറോ വാഗ്ദാനം ചെയ്തിരുന്നു. 

2024 ജനുവരി 14ന് പണം നല്‍കി 10 മാസം കഴിഞ്ഞിട്ടും മറുപടി നല്‍കുകയോ, വാക്ക് പാലിക്കുകയോ ചെയ്തില്ല. അന്വേഷണം തുടരുകയാണെന്ന മറുപടിയാണ് ഫോണ്‍ വിളിച്ചപ്പോള്‍ ലഭിച്ചത്. 
പരാതിക്കാരനുവേണ്ടി അഡ്വ. കെ.കെ. രമേഷ് ഹാജരായി.