കോയമ്പത്തൂർ വാഹനാപകടത്തിൽ മരിച്ചത് ഒരു കുടുംബത്തിലെ 3 പേർ. ദാരുണാന്ത്യം തിരുവല്ല സ്വദേശികൾക്ക്. മരിച്ചവരിൽ രണ്ട് മാസം പ്രായമുള്ള കുഞ്ഞും

കോയമ്പത്തൂർ: കാറിൽ ലോറി ഇടിച്ച് കോയമ്പത്തൂർ എൽആൻടി ബൈപ്പാസിൽ ഒരു കുടുംബത്തിലെ 3 പേർക്ക് ദാരുണാന്ത്യം.

തിരുവല്ല ഇരവിപേരൂര്‍ കുറ്റിയില്‍ കെസി എബ്രഹാമിന്റെ മകന്‍ ജേക്കബ് എബ്രഹാം (60), ഭാര്യ ഷീല ജേക്കബ് (55), പേരക്കുട്ടി രണ്ടുമാസം പ്രായമായ ആരോണ്‍ ജേക്കബ് തോമസ് എന്നിവരാണ് മരിച്ചത്.

ഇവർക്കൊപ്പമുണ്ടായിരുന്ന മരുമകൾ എലീന തോമസ് (30) നെ ഗുരുതര പരുക്കുകളോടെ സുന്ദരാപുരം അഭിരാമി ആശുപത്രിയിലേക്ക് മാറ്റി.

തിരുവല്ലയില്‍ നിന്ന് ബെംഗളൂരുവിലേക്ക് പോകുകയായിരുന്ന കാർ പാലക്കാട് ഭാഗത്തേക്ക് വന്നിരുന്ന കൊറിയര്‍ വാനുമായാണ് കൂട്ടിയിടിച്ചത്.

മരുമകള്‍ അലീനയെയും കുഞ്ഞിനെയും ബെംഗളൂരുവിലേക്ക് കൊണ്ടാക്കാനായി പോകുന്നതിനിടെയാണ് അപകടം. മൃതദേഹങ്ങള്‍ കോയമ്പത്തൂര്‍ മെഡിക്കല്‍ കോളജ് ആശുപത്രിയിലേക്ക് മാറ്റി.

വ്യാഴാഴ്ച രാവിലെ 11.30ന് മധുക്കര എല്‍ ആന്‍ഡ് ടി ബൈപാസില്‍ നയാര പെട്രോള്‍ പമ്പിനു സമീപമായിരുന്നു അപകടം.