ഇരയെ സൈബർ ലിഞ്ചിങ്ങിന് വിധേയമാക്കുന്നവർക്കെതിരെ നിയമനടപടി വേണം. ഇരയ്ക്കെതിരെ സമൂഹ മാധ്യമങ്ങളിലൂടെ 'ഡോഗ് വിസിൽ' മുഴക്കുന്ന ക്രിമിനലുകൾ നിയമ നടപടിയുടെ രുചിയറിയണം: അഡ്വ. ഹരീഷ് വാസുദേവൻ

കൊച്ചി: യുവ നേതാവ് രാഹുൽ മാങ്കൂട്ടത്തിലിനെതിരായ ലൈംഗിക പീഡന പരാതിയിൽ ഇരയെ സൈബർ ഇടങ്ങളിൽ വേട്ടയാടുന്നവർക്കെതിരെ ശക്തമായ നിയമനടപടി വേണമെന്ന് അഡ്വ. ഹരീഷ് വാസുദേവൻ ആവശ്യപ്പെട്ടു. 

പരാതിക്കാരിയെ ലക്ഷ്യമിട്ട് സൈബർ ലിഞ്ചിങ്ങിന് നേതൃത്വം നൽകുന്നതും 'വിക്ടിം ഷെയ്മിംഗിന്' കൂട്ടുനിൽക്കുന്നതും ലോക്കപ്പിൽ കിടത്തി ചികിത്സ നൽകേണ്ട രോഗമാണെന്നും അദ്ദേഹം അഭിപ്രായപ്പെട്ടു.

ജാമ്യാപേക്ഷയിൽ രാഹുൽ മാങ്കൂട്ടത്തിൽ സമ്മതിച്ച കാര്യങ്ങൾ തന്നെ അദ്ദേഹത്തിന്റെ വ്യക്തിഗത നിലവാരം വ്യക്തമാക്കുന്നുണ്ട്.

 എന്നിട്ടും ഇരയ്ക്കെതിരെ സമൂഹ മാധ്യമങ്ങളിലൂടെ 'ഡോഗ് വിസിൽ' മുഴക്കുന്ന ക്രിമിനലുകൾ നിയമ നടപടിയുടെ രുചിയറിയണം.

 ഇത്തരം ക്രിമിനൽ പ്രവണതകൾ ഇനിയെങ്കിലും അവസാനിക്കണമെന്നും അദ്ദേഹം കൂട്ടിച്ചേർത്തു.

ആരോപണ വിധേയനായ വ്യക്തിയെ ഇപ്പോഴും ജനപ്രതിനിധിയായി ചുമക്കേണ്ടി വരുന്ന അവസ്ഥ ഒരു നാടിന്റെ ദയനീയ ഗതികേടായി അദ്ദേഹം ചൂണ്ടിക്കാട്ടി.

ഒരു ജനപ്രതിനിധിക്ക് എതിരെ ആരോപണം ഉയർന്നിട്ടും അദ്ദേഹത്തെ അറസ്റ്റ് ചെയ്യേണ്ട പോലീസ് പോലും സല്യൂട്ട് ചെയ്തിട്ട് വേണം അറസ്റ്റ് ചെയ്യാനെന്നത് ഇന്ത്യൻ ജനാധിപത്യത്തിന്റെ ഗതികേടാണ്. 

ജയിപ്പിച്ചു വിട്ടാൽ ഏത് 'പെർവേർട്ടി'നെയും അഞ്ചു വർഷം ചുമക്കേണ്ടി വരുന്നത് ഭരണഘടനയുടെ കൂടി ഗതികേടാണ് എന്നും ഹരീഷ് വാസുദേവൻ വിമർശിച്ചു.

അഡ്വ. ഹരീഷ് വാസുദേവൻ തന്റെ സമൂഹ മാധ്യമ അക്കൗണ്ടിൽ പങ്കുവെച്ച ഈ കുറിപ്പ് രാഷ്ട്രീയ-നിയമ വൃത്തങ്ങളിൽ വലിയ ചർച്ചയായിട്ടുണ്ട്.