ആലപ്പുഴ: വ്യാജ രജിസ്ട്രേഷൻ നമ്പർ സ്റ്റിക്കർ പതിപ്പിച്ച് സർവീസ് നടത്തിയ ഹൗസ്ബോട്ട് പിടിച്ചെടുത്തു. ആലപ്പുഴ പുന്നമടയിലെ ജെട്ടിയിൽ പ്രവർത്തിക്കുന്ന ഹൗസ്ബോട്ടാണ് പിടിച്ചെടുത്തത്. ജെട്ടിക്ക് സമീപത്ത് നടത്തിയ പരിശോധനയിലാണ് ക്യൂൻ എലിസബത്ത് എന്ന പേരിൽ സർവീസ് നടത്തുന്ന ബോട്ട് പിടിച്ചെടുത്തത്. തുറമുഖ അധികൃതരുടെ നേതൃത്വത്തിലായിരുന്നു പരിശോധന.
വ്യാജ നമ്പർ സ്റ്റിക്കർ ഉപയോഗിച്ച് സർവീസ് നടത്തുന്നതായി സംശയം തോന്നിയതോടെയാണ് ഉദ്യോഗസ്ഥർ പരിശോധന നടത്തിയത്. തുടർന്ന് രേഖകൾ പരിശോധിച്ചപ്പോഴാണ് നമ്പർ വ്യാജമാണെന്ന് തെളിഞ്ഞത്. പിടിച്ചെടുത്ത ഹൗസ് ബോട്ട് തുറമുഖ ഉദ്യോഗസ്ഥർ യാർഡിലേക്ക് മാറ്റിയിട്ടുണ്ട്.
പോർട്ട് കൺസർവേറ്റർ ഇൻസ്പെക്ഷൻ ടീം കെ അനിൽകുമാറിന്റെ നേതൃത്വത്തിലാണ് പരിശോധന നടന്നത്.