ബംഗളൂരുവിൽ മലയാളി നഴ്​സിങ്​ വിദ്യാർഥിയെ കെട്ടിയിട്ട്​ അതിക്രൂരമായി മർദിച്ചു; നഴ്​സിങ്​ അഡ്​മിഷൻ നടത്തുന്ന സംഘത്തിനെതിരെ പരാതി

ആലപ്പുഴ: ബംഗളൂരുവിൽ മലയാളി നഴ്​സിങ്​ വിദ്യാർഥിയെ കെട്ടിയിട്ട്​ അതിക്രൂരമായി മർദിച്ചതായി പരാതി.  നഴ്​സിങ്​ അഡ്​മിഷൻ നടത്തുന്ന മലയാളി ഏജന്‍റുമാരുടെ നേതൃത്വത്തിലുള്ള സംഘം നാലുമണിക്കൂറോളം​ ക്രൂരമായി മർദിച്ചു. 

സുശ്രുതി നഴ്​സിങ്​ കോളജ്​ ഒന്നാംവർഷ വിദ്യാർഥി മാവേലിക്കര മാങ്കാംകുഴി പുത്തൻപുരയിൽ ഷിജിയുടെ മകൻ എസ്​. ആദിലാണ് മർദ്ദനത്തിരയായത്. രക്ഷപ്പെട്ട്​ നാട്ടി​ലെത്തിയ ആദിൽ ആലപ്പുഴ വണ്ടാനം മെഡിക്കൽ കോളജ്​ ആശുപത്രിയിൽ ചികിത്സതേടി. 

ഈ മാസം മൂന്നിനാണ്​ കേസിനാസ്പദമായ സംഭവം. ഏജന്‍റുമാരുടെ ഓഫിസിലെത്തിയ ആദിലിനെ കൈയും കാലും കൂട്ടിക്കെട്ടി തടിക്കഷണവും ഇരുമ്പുവടിയും ഉപയോഗിച്ച്​ മർദിക്കുകയായിരുന്നു. പിന്നീട്​ നിലത്തുകിടത്തി ചവിട്ടി, നഗ്​നചിത്രം പകർത്തുകയും ചെയ്തു. മയക്കുമരുന്ന്​ ഉപയോഗിക്കുന്ന ആളാണെന്നും ഇത്​ വിതരണം ചെയ്യുന്ന ഏജന്‍റാണെന്നും മുദ്രപ്പത്രത്തിൽ എഴുതിപ്പിച്ചു. വിവരം പുറത്തുപറഞ്ഞാൽ മയക്കുമരുന്ന്​ കേസിൽ ഉൾപ്പെടുത്തി ജയിലിലാക്കി കൊന്നുകളയുമെന്നും ഭീഷണിപ്പെടുത്തി. അവശനായ ആദിലിനെ മർദിച്ചവർതന്നെ ഹോസ്റ്റലിൽ എത്തിക്കുകയായിരുന്നു.