ആലപ്പുഴയില്‍ മദ്യപിച്ച് വാഹനം ഓടിച്ചു;  ഡിവൈഎസ്പി പിടിയില്‍

ആലപ്പുഴ: ആലപ്പുഴയില്‍ മദ്യപിച്ച് വാഹനം ഓടിച്ച ഡിവൈഎസ്പി പിടിയില്‍. സംസ്ഥാന ക്രൈം റെക്കോര്‍ഡ്‌സ് ബ്യൂറോ ഡിവൈഎസ്പി വി അനില്‍കുമാറാണ് പിടിയിലായത്. അരൂര്‍ പോലീസ് ആണ് കസ്റ്റഡിയിലെടുത്തത്. ചന്തിരൂരില്‍ വെച്ചാണ് ഡിവൈഎസ്പി പിടിയിലായത്. ഔദ്യോഗിക വാഹനമാണ് മദ്യപിച്ച് അപകടകരമായ വിധത്തില്‍ ഓടിച്ചത്.

പൊലീസ് നടത്തിയ പരിശോധനയിലാണ് മദ്യപിച്ചതായി മനസിലായത്. നേരത്തെ തന്നെ വാഹനം ഓടിച്ചുവരുന്നത് കണ്ട പലരും പരാതി പറഞ്ഞിരുന്നു. തുടര്‍ന്ന് ചന്തിരൂരില്‍ വെച്ച് അരൂര്‍ പൊലീസ് വാഹനം നിര്‍ത്തിച്ച് പരിശോധന നടത്തുകയായിരുന്നു.

ഔദ്യോഗിക കാര്യങ്ങള്‍ക്ക് വേണ്ടിയായിരുന്നില്ല പോയതെന്നായിരുന്നു ഡിവൈഎസ്പി വിശദീകരിച്ചത്. അരൂര്‍ പൊലീസ് ഡിവൈഎസ്പിയെ കസ്റ്റഡിയിലെടുത്തിട്ടുണ്ട്. എന്നാല്‍ മദ്യപിച്ച് വാഹനം ഓടിച്ചതിന് പൊലീസ് കേസെടുത്തിട്ടില്ല.