കോട്ടയം: പകുതി വിലയ്ക്ക് സ്കൂട്ടര് തട്ടിപ്പില് കണ്ണൂര് ടൗണ് പൊലീസെടുത്ത കേസില് കോണ്ഗ്രസ് നേതാവ് ലാലി വിന്സന്റ് ഏഴാം പ്രതി. കണ്ണൂര് ബ്ലോക്കില് 494 പേരില് നിന്ന് 3 കോടിയോളം തട്ടിയെന്നാണ് കേസ്. അനന്തു കൃഷ്ണന് ഉള്പ്പെടെ കേസില് ഏഴ് പ്രതികളാണുള്ളത്.
അതേസമയം സിഎസ്ആര് ഫണ്ടിന്റെ മറവില് അനന്തുകൃഷ്ണന് നടത്തിയ വന്കിട തട്ടിപ്പുകളില് അന്വേഷണം ക്രൈംബ്രാഞ്ചിന് കൈമാറും
സാമ്പത്തിക കുറ്റകൃത്യം അന്വേഷിക്കുന്ന സംഘമാണ് തട്ടിപ്പ് അന്വേഷിക്കുക. കൊച്ചി യൂണിറ്റിനാണ് അന്വേഷണ ചുമതല. അനന്തു കൃഷ്ണനെതിരെ പരാതികള് വ്യാപകമായ സാഹചര്യത്തിലാണ് അന്വേഷണം ക്രൈംബ്രാഞ്ചിലേക്ക് മാറ്റുന്നത്.
പകുതി വിലയ്ക്ക് സ്കൂട്ടര് തട്ടിപ്പിലെ പ്രതി അനന്തു കൃഷ്ണനെതിരെ കണ്ണൂരില് മാത്രം രണ്ടായിരത്തോളം പരാതികളാണുള്ളത്
കണ്ണൂര്, തളിപ്പറമ്പ്, ശ്രീകണ്ഠപുരം, മയ്യില്, വളപട്ടണം, പയ്യന്നൂര് സ്റ്റേഷനുകളിലാണ് പരാതി ലഭിച്ചിട്ടുള്ളത്.
അനന്തു കൃഷ്ണനെതിരെ പരാതികളുടെ എണ്ണം ദിനം പ്രതി കൂടുകയാണ്. പകുതി വിലയ്ക്ക് ലാപ്ടോപ്പ്, തയ്യല് മെഷീന് തുടങ്ങിയവയും പ്രതി വാഗ്ദാനം ചെയ്തിരുന്നു.
വിമണ് ഓണ് വീല്സ് എന്ന പദ്ധതിയുടെ പേരിലായിരുന്നു ലക്ഷങ്ങളുടെ തട്ടിപ്പ് നടന്നത്. വാഹനത്തിന്റെ പകുതി തുക അടച്ചാല് ബാക്കി പകുതി തുക കേന്ദ്രസര്ക്കാര് സഹായമായും വലിയ കമ്പനികളുടേതടക്കം സിഎസ്ആര് ഫണ്ടായി ലഭിക്കുമെന്നുമായിരുന്നു വാഗ്ദാനം.