തൊണ്ടിമുതൽ തിരിമറിക്കേസിൽ നടപടി; ആന്‍റണി രാജു പ്രതിയായ കേസിന്‍റെ വിചാരണ തടഞ്ഞ്​ ഹൈകോടതി

കൊച്ചി: മുൻ മന്ത്രി ആന്റണി രാജു എം.എൽ.എ പ്രതിയായ തൊണ്ടിമുതൽ തിരിമറിക്കേസിൽ വിചാരണ കോടതി ഉത്തരവ്​ പുറപ്പെടുവിക്കുന്നത്​ ഹൈകോടതി താൽകാലികമായി തടഞ്ഞു.

കോടതി ജീവനക്കാരനായ ഒന്നാംപ്രതി ജോസ്​ സർക്കാർ സർവിസിലുള്ളയാളായതിനാൽ വഞ്ചനക്കുറ്റമടക്കം ​പ്രതികൾക്കെതിരെ ചുമത്ത​ണമെന്ന് ആവശ്യപ്പെട്ട്​ മാധ്യമ പ്രവർത്തകനായ അനിൽ ഇമ്മാനുവൽ സമർപ്പിച്ച ഹരജിയിലാണ്​ ജസ്റ്റിസ്​ കൗസർ എടപ്പഗത്തിന്‍റെ ഇടക്കാല ഉത്തരവ്​.

വിചാരണ നടക്കുന്ന നെടുമങ്ങാട് ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതി ഈ ആവശ്യം നിരസിച്ചതിനെ തുടർന്നാണ്​ ഹൈകോടതിയെ സമീപിച്ചത്​. എതിർകക്ഷികൾക്ക്​ നോട്ടീസയക്കാൻ ഉത്തരവായ ഹൈകോടതി, ഒക്​ടോബർ 28ന്​ ഹരജി വീണ്ടും പരിഗണിക്കാൻ മാറ്റി.