പാലാ രാമപുരത്ത് പെട്രോളൊഴിച്ച് കത്തിച്ചതിനെ തുടര്‍ന്ന് ചികിത്സയിലായിരുന്ന ജ്വല്ലറി ഉടമ മരിച്ചു. മരിച്ച അശോകന് 80 ശതമാനം പൊള്ളലേറ്റിരുന്നു. പ്രതി തുളസീദാസിനെ ഇന്നു കോടതിയില്‍ ഹാജരാക്കും

കോട്ടയം: സാമ്പത്തിക ഇടപാടിനെ ചൊല്ലി പാലാ രാമപുരത്ത് പെട്രോളൊഴിച്ച് കത്തിച്ചതിനെ തുടര്‍ന്ന് ചികിത്സയിലായിരുന്ന ജ്വല്ലറി ഉടമ മരിച്ചു.

രാമപുരം ബസ് സ്റ്റാന്‍ഡിന് സമീപം പ്രവര്‍ത്തിക്കുന്ന കണ്ണനാട്ട് ജ്വല്ലറി ഉടമ അശോകനാണ് (55) മരിച്ചത്. കോട്ടയം മെഡിക്കല്‍ കോളജില്‍ ചികിത്സയിലിരിക്കെ ഇന്ന് രാവിലെയാണ് മരിച്ചത്. അശോകന് 80 ശതമാനം പൊള്ളലേറ്റിരുന്നു.

ഇന്നലെ രാവിലെ 10.45ന് ആണ് ഇളംതുരുത്തിയില്‍ തുളസീദാസ് (ഹരി, 54) ജ്വല്ലറിയിലെത്തി അശോകന് നേര്‍ക്ക് പെട്രോള്‍ ഒഴിച്ച് തീ കൊളുത്തിയത്.

സാമ്പത്തിക ഇടപാടുമായി ബന്ധപ്പെട്ട തര്‍ക്കമാണ് ആക്രമണത്തിനു കാരണമെന്ന് പറയുന്നു. ഇരുവരും തമ്മില്‍ തകര്‍ക്കം സംബന്ധിച്ച് രാമപുരം സ്റ്റേഷനില്‍ തന്നെ പരാതികളും കേസുകളും ഉണ്ടായിട്ടുണ്ട്.

തീയിട്ട ഉടന്‍ ഓടി രക്ഷപെട്ട പ്രതി ഹരി, ഒരു മണിക്കൂറിനുശേഷം രാമപുരം പോലീസില്‍ കീഴടങ്ങിയിരുന്നു. ഇയാളെ ഇന്ന്  കോടതിയില്‍ ഹാജരാക്കും.