കത്തോലിക്കാ കോൺഗ്രസ് അവകാശ സംരക്ഷണ യാത്രക്ക് സെക്രട്ടറിയേറ്റ് മാർച്ചോടും ധർണ്ണയോടും കൂടി സമാപനം

തിരുവനന്തപുരം/ കോട്ടയം  : കത്തോലിക്ക കോൺഗ്രസിൻ്റെ നേതൃത്വത്തിൽ വിവിധ ജനകീയ ആവശ്യങ്ങൾ ഉന്നയിച്ച് ഒക്ടോബർ 13 നു കാസർകോഡ് തുടങ്ങിയ  'അവകാശ സംരക്ഷണ യാത്ര'  ഇന്ന് രാവിലെ 10 മണിക്ക്  തിരുവനന്തപുരത്ത് പാളയം രക്തസാക്ഷി   മണ്ഡപത്തിൽ നിന്നും ആരംഭിക്കുന്ന ആയിരങ്ങൾ അണിനിരക്കുന്ന സെക്രട്ടറിയേറ്റ് മാർച്ചോടെയും , തുടർന്ന് സെക്രട്ടറിയേറ്റിനു മുൻപിൽ നടക്കുന്ന ധർണ്ണയോടെയും സമാപിക്കും .  

കത്തോലിക്ക കോൺഗ്രസ് പ്രസിഡന്റ് പ്രൊഫ. രാജീവ് കൊച്ചുപറമ്പിൽ  അദ്ധ്യക്ഷത വഹിക്കുന്ന യോഗം , ചങ്ങനാശ്ശേരി അതിരൂപത മെത്രാപ്പോലീത്ത ആർച്ച്ബിഷപ് മാർ തോമസ് തറയിൽ ഉദ്ഘാടനം  ചെയ്യും .ബിഷപ്പ് ലഗേറ്റ് മാർ റെമിജിയുസ് ഇഞ്ചനാനിയിൽ അനുഗ്രഹ പ്രഭാഷണം നടത്തും .  തുടർന്ന് കത്തോലിക്ക കോൺഗ്രസ് അവകാശ പത്രിക പ്രഖ്യാപനവും സമർപ്പണവും നടക്കും .  സമുദായ - സാമൂഹ്യ നേതാക്കന്മാർ , വിവിധ രൂപതകളിൽ നിന്നുള്ള സമുദായ അംഗങ്ങൾ തുടങ്ങിയവർ പങ്കെടുക്കും.

വിവിധ കേന്ദ്രങ്ങളിലെ സ്വീകരണങ്ങൾക്കൊപ്പം ചിറ്റാരിക്കൽ,പേരാവൂർ, മാനന്തവാടി, തിരുവമ്പാടി, മണ്ണാർക്കാട്,തൃശൂർ,ഇരിങ്ങാലക്കുട, അങ്കമാലി , കോതമംഗലം, കട്ടപ്പന, കാഞ്ഞിരപ്പള്ളി, പാലാ,കുട്ടനാട്,ചങ്ങനാശ്ശേരി,തിരുവനന്തപുരം എന്നിവിടങ്ങളിൽ സമുദായ - സാമൂഹ്യ നേതാക്കന്മാർ, സമുദായ അംഗങ്ങൾ  തുടങ്ങിയവർ പങ്കെടുത്ത ജനകീയ മഹാ സമ്മേളനങ്ങൾ സംഘടിപ്പിച്ചു .

നീതി ഔദാര്യമല്ല അവകാശമാണ്' എന്ന മുദ്രാവാക്യവുമായി മതേതരത്വവും രാജ്യത്തിന്റെ ഭരണഘടനയും സംരക്ഷിക്കുക,ജസ്റ്റിസ്'ജെ ബി കോശി കമ്മീഷൻ റിപ്പോർട്ട് പ്രസിദ്ധീകരിച്ച് നടപ്പിലാക്കുക,വന്യമൃഗ ശല്യവും ഭൂപ്രശ്നങ്ങളും അവസാനിപ്പിക്കുക,റബ്ബർ,നെല്ല് ഉൾപ്പെടെ കാർഷിക ഉൽപന്നങ്ങളുടെ വില തകർച്ചയ്ക്ക് പരിഹാരം കാണുക,വിദ്യാഭ്യാസ - ന്യൂനപക്ഷ രംഗങ്ങളിലെ അവഗണനകൾ അവസാനിപ്പിക്കുക തുടങ്ങിയ ആവശ്യങ്ങൾ ഉന്നയിച്ചാണ് യാത്ര നടത്തിയത് .

ഡയറക്ടർ ഡയറക്ടർ ഫാ.ഫിലിപ്പ് കവിയിൽ, ജനറൽ സെക്രട്ടറി ഡോ ജോസ്കുട്ടി ജെ ഒഴുകയിൽ,ട്രഷറർ അഡ്വ. ടോണി പുഞ്ചകുന്നേൽ, ഭാരവാഹികളായ ഡോ.കെ.എം. ഫ്രാൻസിസ്,ബെന്നി ആന്റണി,ട്രീസ ലിസ് സെബാസ്റ്റ്യൻ,രാജേഷ് ജോൺ,ജോർജ് കോയിക്കൽ,ബിജു സെബാസ്റ്റ്യൻ, ഫിലിപ്പ് വെളിയത്ത്, ജേക്കബ് നിക്കോളാസ്, അഡ്വ . മനു വരാപ്പള്ളി  തുടങ്ങിയവരുടെ നേതൃത്വത്തിൽ ക്രമീകരണങ്ങൾ പൂർത്തിയായതായി സംഘാടക സമിതി അറിയിച്ചു .