രാഹുല്‍ മാങ്കൂട്ടത്തിലിനെതിരെ പരാതി നല്‍കിയ യുവതിയ്‌ക്കെതിരെ സാമൂഹ്യമാധ്യമങ്ങളിലൂടെയും അല്ലാതെയും അധിക്ഷേപങ്ങള്‍.. പിന്നില്‍ രാഹുലിന്റെ വിശ്വസ്തര്‍.. രാഹുലിനെ പിന്തുണയ്ക്കുന്നവരുടെ വാദങ്ങള്‍ തള്ളി യുവതിയുടെ മൊഴി

കോട്ടയം: രാഹുല്‍ മാങ്കൂട്ടത്തിലിനെതിരെ നിര്‍ബന്ധിത ഗര്‍ഭഛിദ്ര പരാതി നൽകിയ യുവതിയ്ക്കു സാമൂഹ്യമാധ്യമങ്ങളിലൂടെയും അല്ലാതെയും അധിക്ഷേപങ്ങള്‍. കോണ്‍ഗ്രസ് നേതാക്കള്‍ മുതല്‍ സൈബര്‍ ഗ്രൂപ്പുകള്‍ വരെ ഇത്തരത്തില്‍ അധിക്ഷേപങ്ങള്‍ക്കു ശ്രമിക്കുന്നു.

പരാതിക്കാരിയുടെ അന്തസിനെയും ആത്മാഭിമാനത്തെയും ചോദ്യം ചെയ്യുന്ന തരത്തിലാണു ചില നേതാക്കളുടെ പ്രതികരണം. ഇതോടൊപ്പം ചാനല്‍ ചര്‍ച്ചകളില്‍ രാഹുല്‍ വക്താക്കളായി എത്തി വായില്‍ തോന്നിയത് എന്തും വളിച്ചു പറയുന്നവരുമുണ്ട്.

യുവതിയെ പൊതുസമൂഹത്തിന് തിരിച്ചറിയാന്‍ സാധിക്കത്തക്കവണ്ണം ഇക്കൂട്ടര്‍ പല പരാമര്‍ശങ്ങളും നടത്തുന്നതു യുവതിയെ ഭീഷണിപ്പെടുത്തുന്നതിനു തുല്യമാണ്.

രാഹുല്‍ മാങ്കൂട്ടത്തില്‍ ലൈംഗികപീഡനവും നിര്‍ബന്ധിത ഗര്‍ഭഛിദ്രവും നടത്തിയെന്ന യുവതിയുടെ പരാതിയില്‍ മൊഴിയുടെ കൂടുതല്‍ വിവരങ്ങള്‍ പുറത്തു വന്നിരുന്നു.

ആദ്യ വിവാഹത്തില്‍ പങ്കാളിക്കൊപ്പം നാലു ദിവസം മാത്രമാണ് ഒരുമിച്ചു താമസിച്ചതെന്നും ഒരു മാസത്തിനുള്ളില്‍ ബന്ധത്തില്‍ നിന്നും ഒഴിഞ്ഞുവെന്നും രാഹുലിനെ അതിന് ശേഷമാണു പരിചയപ്പെട്ടതെന്നും മൊഴിയിലുണ്ട്.

വിവാഹം നടന്നത് 2024 ഓഗസ്റ്റ് 22ന് ക്ഷേത്രത്തില്‍ വെച്ചായിരുന്നു. ആചാരപ്രകാരം വിവാഹം കഴിച്ചതാണെങ്കിലും ക്ഷേത്രത്തിലോ മറ്റേതെങ്കിലും സംവിധാനത്തിലോ രജിസ്റ്റര്‍ ചെയ്തിട്ടില്ല എന്നും പെണ്‍കുട്ടി പോലീസിനോട് പറഞ്ഞതായാണു വിവരം.

യുവതിയുമായി ബന്ധം ഉണ്ടായിരുന്നതും പുറത്തു വന്ന സംഭാഷണത്തിയെും ഭീഷണിയുടെയും ശബ്ദരേഖ തന്റേതു തന്നെയാണെന്നു രാഹുല്‍ മാങ്കൂട്ടത്തില്‍ സമ്മതിച്ചിട്ടുണ്ട്. മുന്‍കൂര്‍ ജാമ്യാപേക്ഷയിലാണ് ഇക്കാര്യങ്ങള്‍ പ്രതി സമ്മതിച്ചത്.

എന്നാല്‍, രാഹുല്‍ മാങ്കൂട്ടത്തിലുമായി ബന്ധപ്പെട്ട ബലാത്സംഗക്കേസില്‍ യുവതിയുടെ അഭിഭാഷകന്‍ കോടതിയില്‍ പറഞ്ഞത് തെറ്റാണെന്നു പറഞ്ഞു കോണ്‍ഗ്രസ് നേതാവ് സന്ദീപ് വാര്യര്‍ രംഗത്തു വന്നു.

വിവാഹ ബന്ധം നാലു ദിവസം മാത്രമേ നീണ്ടുനിന്നുള്ളൂ എന്ന അഭിഭാഷകന്‍ കോടതിയില്‍ പറഞ്ഞതു തെറ്റാണ്. മാസങ്ങളോളും തിരുവനന്തപുരത്ത് ഒരുമിച്ച് ഉണ്ടായിരുന്നു. അവര്‍ ഇപ്പോഴും വിവാഹമോചിതരല്ല. താന്‍ വിവാഹത്തില്‍ പങ്കെടുത്ത ആളാണെന്നും സന്ദീപ് വാര്യര്‍ വ്യക്തമാക്കി.

രാഹുലിനെ പരിചയപ്പെട്ടത് ആദ്യ വിവാഹം ഒഴിഞ്ഞ ശേഷമെന്നു യുവതിയുടെ മൊഴി നല്‍കിയതായി റിപ്പോര്‍ട്ടുണ്ടായിരുന്നു. ഇതിന് പിന്നാലെയാണു രാഹുലിനെ അനുകൂലിക്കുന്നവര്‍ അതിനെ എതിര്‍ത്തു രംഗത്തെത്തിയത്.

വിവാഹിതയായ യുവതിയുടെ ഗര്‍ഭത്തിന് ഉത്തരവാദി താനല്ലെന്നും അവരുടെ ഭര്‍ത്താവാണെന്നുമാണു രാഹുല്‍ മാങ്കൂട്ടത്തില്‍ കോടതിയില്‍ നല്‍കിയ മുന്‍കൂര്‍ ജാമ്യാപേക്ഷയില്‍ പറഞ്ഞിരിക്കുന്നത്.

ഗര്‍ഭച്ഛിദ്രം അവരുടെ സ്വന്തം ഇഷ്ടപ്രകാരമാണ് ചെയ്തതെന്നും രാഹുല്‍ വാദിക്കുകയുണ്ടായി. ഇതിനെയെല്ലാം ന്യായീകരിക്കാന്‍ ശ്രമിക്കുന്നതാണ് സന്ദീപ് വാര്യരുടെ ഫേസ്ബുക്ക് പോസ്റ്റ്.

കോണ്‍ഗ്രസ് നേതാക്കള്‍ക്ക് പിന്നാലെ മാങ്കൂട്ടത്തിലിനെ സംരക്ഷിച്ചു മുഖപത്രവും രംഗത്തെത്തി. ഒളിവില്‍ പോയ മാങ്കൂട്ടത്തിലിനു പൂര്‍ണ പിന്തുണയാണ് കോണ്‍ഗ്രസ് മുഖപത്രം വീക്ഷണം എഡിറ്റോറിയലിലൂടെ വ്യക്തമാക്കിയത്.

രാഷ്ട്രീയ ഗൂഢാലോചനയുടെ ഇരയാണ് രാഹുല്‍ മാങ്കൂട്ടത്തില്‍ എന്നാണ് പത്രത്തിന്റെ ന്യായീകരണം. പാലക്കാട് ഉപതെരഞ്ഞെടുപ്പില്‍ എല്‍ഡിഎഫിനെയും ബിജെപിയെയും ചരിത്ര ഭൂരിപക്ഷത്തില്‍ തോല്‍പ്പിച്ചതായിരുന്നു രാഹുല്‍ ചെയ്ത കുറ്റം.

അപവാദങ്ങളില്‍ പതറാതെയും വ്യക്തിഹത്യകളില്‍ തളരാതെയും ജാഗ്രതയോടെ മുന്നോട്ട് പോകണമെന്നാണു വീക്ഷണത്തിലെ ലേഖനത്തില്‍ പറയുന്നത്. ഇപ്പോഴും മാങ്കൂട്ടത്തിലിനെ വെള്ളപൂശുന്ന കോണ്‍ഗ്രസ് നേതൃത്വത്തിൻ്റെ നിലപാടുകള്‍ക്കെതിരെ വ്യാപക വിമര്‍ശനമാണ് ഉയരുന്നത്.