റോഡ് നിര്‍മാണത്തിനെന്ന പേരില്‍ കേരള റോഡ് ഫണ്ട് ബോര്‍ഡ് അക്കൗണ്ടില്‍ നിന്ന് അഞ്ച് കോടിയോളം രൂപ തട്ടിയെടുത്ത കേസില്‍ കോണ്‍ട്രാക്ടര്‍ അറസ്റ്റില്‍

തിരുവനന്തപുരം: റോഡ് നിര്‍മാണത്തിനെന്ന പേരില്‍ കേരള റോഡ് ഫണ്ട് ബോര്‍ഡ് അക്കൗണ്ടില്‍ നിന്ന്  അഞ്ച് കോടിയോളം രൂപ തട്ടിയെടുത്ത കേസില്‍ കോണ്‍ട്രാക്ടര്‍ അറസ്റ്റില്‍. വിളപ്പില്‍ പിറയില്‍ സ്വദേശിയായ ഗവണ്‍മെന്റ് കോണ്‍ട്രാക്ടറായ പ്രദീപാണ് (54) അറസ്റ്റിലായത്. 

കേരള റോഡ് ഫണ്ട് ബോര്‍ഡിന്റെ എക്സിക്യൂട്ടീവ് എഞ്ചിനീയറുടെ പേരില്‍ എസ്ബിഐ കുറവന്‍കോണം ശാഖയിലുള്ള അക്കൗണ്ടില്‍ നിന്ന് പ്രദീപ് ഉള്‍പ്പെടെയുള്ള പ്രതികള്‍ ചേര്‍ന്ന് 4.85 കോടി തട്ടിയെടുത്തെന്നാണ് കേസ്.

20212024 കാലയളവിലായിരുന്നു തട്ടിപ്പെന്ന് മ്യൂസിയം പൊലീസ് പറഞ്ഞു. ചെയ്യാത്ത ജോലിക്ക് ഇയാളുടെ അക്കൗണ്ടിലേക്ക് 1.80 കോടി ബോര്‍ഡില്‍ നിന്ന് നല്‍കിയെന്നും കൂടാതെ 40 ലക്ഷത്തോളം രൂപ നേരിട്ട് നല്‍കിയെന്നും കണ്ടെത്തിയിരുന്നു. 

കേസില്‍ മൂന്ന് പ്രതികളാണുള്ളത്. ഒന്നാം പ്രതിയായ കേരള റോഡ് ഫണ്ട് ബോര്‍ഡിലെ എക്‌സിക്യൂട്ടീവ് എന്‍ജിനിയര്‍ ജീജ ഭായ് ഒളിവിലാണ്. 

രണ്ടാം പ്രതിയായ ഓഫീസ് ക്ലര്‍ക്ക് സുസ്മി പ്രഭയെ നേരത്തെ അറസ്റ്റ് ചെയ്തിരുന്നു. മൂന്നാം പ്രതിയായ  പ്രദീപിനെ കോടതിയില്‍ ഹാജരാക്കി റിമാന്‍ഡ് ചെയ്തു.