തിരുവനന്തപുരത്ത് ആശുപത്രി ജീവനക്കാരി മരിച്ച നിലയിൽ, ജീവനൊടുക്കിയത് വിഷാദ രോഗം കാരണമെന്ന് പൊലീസ്

തിരുവനന്തപുരം: ശാസ്തമംഗലത്ത് ആശുപത്രി ജീവനക്കാരിയെ മരിച്ച നിലയിൽ കണ്ടെത്തി. കോഴിക്കോട് സ്വദേശിനി അലിഷ ഗണേഷിനെയാണ് മരിച്ച നിലയിൽ കണ്ടെത്തിയത്. 28 വയസ്സായിരുന്നു.

ശാസ്തമംഗലം എസ് പി ഫോർട്ട് ആശുപത്രിയിലെ ഓഫീസ് അഡ്മിനിസ്ട്രേഷൻ വിഭാഗത്തിൽ ജോലി ചെയ്യുകയായിരുന്നു യുവതി. എന്നാൽ കഴിഞ്ഞ രണ്ടു ദിവസമായി യുവതിയെ സംബന്ധിച്ച് യാതൊരു വിവരവുമുമില്ലായിരുന്നു. 

തുടർന്ന് പൊലീസിൽ പരാതി നൽകി. പരാതിക്ക് പിന്നാലെ നടത്തിയ അന്വേഷണത്തിലാണ് താമസസ്ഥലത്ത് മരിച്ച നിലയിൽ കണ്ടെത്തിയത്. വിഷാദ രോഗമാണ് യുവതിയെ ആത്മഹത്യയിലേക്ക് നയിച്ചതെന്ന് പൊലീസ് പറയുന്നു. 

അന്വേഷണത്തിന്റെ ഭാഗമായി ആത്മഹത്യ കുറിപ്പ് കണ്ടെടുത്തു. ജീവിതത്തിൽ സന്തോഷം കണ്ടെത്താൻ കഴിയുന്നില്ലെന്നും മരണത്തിന് പിന്നിൽ ആരുമില്ലെന്നും യുവതി കത്തിൽ പറയുന്നു.