'കാലം ഒരു അനീതിയോടും കണക്ക് ചോദിക്കാതെ പോയിട്ടില്ല, ഇതിലും മികച്ചത് സ്വപ്‌നങ്ങളില്‍ മാത്രം'; രാഹുലിന്റെ രാജി വാര്‍ത്ത അച്ചടിച്ച പത്രത്തില്‍ പൊതിച്ചോര്‍ നല്‍കി ഡിവൈഎഫ്‌ഐ

കണ്ണൂര്‍: രാഹുൽ മാങ്കൂട്ടത്തിലിന്റെ രാജി വാര്‍ത്ത അച്ചടിച്ച പത്രത്തില്‍ പൊതിച്ചോര്‍ നല്‍കി ഡിവൈഎഫ്‌ഐ. യൂത്ത് കോണ്‍ഗ്രസ് സംസ്ഥാന അധ്യക്ഷ പദവി രാജിവെച്ചതോടെ ആ വാര്‍ത്ത അച്ചടിച്ച ദേശാഭിമാനി പത്രത്തിലാണ് ഇന്ന് പലയിടത്തും ഡിവൈഎഫ്ഐ പൊതിച്ചോര്‍ വിതരണം നടത്തിയത്. 

കാലം ഒരു അനീതിയോടും കണക്ക് ചോദിക്കാതെ പോയിട്ടില്ലെന്ന് ഡിവൈഎഫ്‌ഐ കോഴിക്കോട് ജില്ലാ സെക്രട്ടറി ഫെയ്‌സ്ബുക്കില്‍ കുറിച്ചു. ഇതിലും മികച്ചത് സ്വപ്‌നങ്ങളില്‍ മാത്രമാണെന്ന് വി ശിവന്‍കുട്ടി ഫെയ്‌സ്ബുക്ക് കുറിച്ചു. ഹൃദയപൂര്‍വം എന്നാണ് മന്ത്രി വീണാ ജോര്‍ജ് ഫെയ്‌സ്ബുക്കില്‍ കുറിച്ചത്.

'ഡിവൈഎഫ്‌ഐയുടെ പൊതിച്ചോര്‍ വിതരണത്തിന് പിന്നില്‍ നടക്കുന്നത് അനാശാസ്യമെന്നാ'യിരുന്നു രാഹുല്‍ മാങ്കൂട്ടത്തില്‍ മുന്‍പ് പ്രതികരിച്ചത്.  ഡിവൈഎഫ്ഐ നടത്തുന്ന സ്നേഹപൂര്‍വ്വം പൊതിച്ചോറിനെതിരെയായിരുന്നു രാഹുല്‍ മാങ്കൂട്ടത്തില്‍ അവഹേളന പരാമര്‍ശം നടത്തിയിരുന്നു.