കാര്‍ഷികവൃത്തി കേവലം ഒരു തൊഴിലായി സ്വീകരിച്ചവരല്ല കര്‍ഷകര്‍, പകരം അതൊരു ദൈവ വിളിയായി സ്വീകരിച്ചവരാണെന്നു ഫാ. തോമസ് മറ്റമുണ്ടയില്‍. കൃഷിഭൂമിയാകുന്ന ബലിവേദിയില്‍ കര്‍ഷക ജീവിതമാകുന്ന ജീവിതബലി അര്‍പ്പിച്ചു ശരീരവും രക്തവും ലോകത്തിനു മുഴുവന്‍ ഭക്ഷണവും പാനീയവുമായി നല്‍കയവരാണു കര്‍ഷകരെന്ന് ഫാ. തോമസ് മറ്റമുണ്ടയില്‍

കാഞ്ഞിരപ്പള്ളി: കാര്‍ഷികവൃത്തി കേവലം ഒരു തൊഴിലായി സ്വീകരിച്ചവരല്ല കര്‍ഷകര്‍, പകരം അതൊരുദൈവ വിളിയായി സ്വീകരിച്ചു ജീവിത അവസ്ഥയായി ഉള്‍ക്കൊണ്ടവരാണെന്നു ഇന്‍ഫാം ദേശീയ ചെയര്‍മാന്‍ ഫാ. തോമസ് മറ്റമുണ്ടയില്‍. 

ദൈവം നിങ്ങള്‍ക്കു നല്‍കിയ കൃഷി ഭൂമിയാകുന്ന ബലിവേദിയില്‍ നിങ്ങളുടെ കര്‍ഷക ജീവിതമാകുന്ന ജീവിത ബലി അര്‍പ്പിച്ചു നിങ്ങളുടെ ശരീരവും രക്തവും ലോകത്തിനു മുഴുവന്‍ ഭക്ഷണവും പാനീയവുമായി നല്‍കയവരാണു കര്‍ഷകര്‍. 

ഉല്‍പ്പാദിപ്പിക്കുന്ന ഉല്‍പ്പന്നങ്ങള്‍ക്കു മതിയായ വില ലഭിക്കാതെയിരുന്നപ്പോഴും വേണ്ടത്ര പരിഗണന ലഭിക്കാതെ അവഗണന ലഭിച്ചപ്പോഴും അതില്‍ പരാതിയില്ലാതെ വിശക്കുന്ന വയറുകള്‍ക്കു അന്നമായി മാറിയവരാണു നിങ്ങള്‍. 

നിങ്ങള്‍ ഞങ്ങള്‍ക്കു കാണപ്പെട്ട ദൈവങ്ങളാണ്. നിങ്ങളുടെ മുഖങ്ങളില്‍ നിര്‍വൃതിയുടെ നിറവുകള്‍ ഞങ്ങള്‍ കാണുന്നുണ്ട്. നിങ്ങളുടെ കണ്ണുകളില്‍ ത്യാഗത്തിന്റെ തിളക്കം ഞങ്ങള്‍ കാണുന്നുണ്ട്.

കര്‍ഷകരുടെ ജീവിതാന്തസ് ഉയര്‍ത്തുന്നതിനും കൃഷിയെയും അനുബന്ധ കൃഷികളെയും പ്രോത്സാഹിപ്പിക്കുന്നതിനും കര്‍ഷകരെയും അവരുടെ കുടുംബാംഗങ്ങളെയും ആദരിക്കുന്നതിനും വേണ്ടിയാണു വിവിധങ്ങളായ അവാര്‍ഡുകള്‍ ഇന്‍ഫാം ഏര്‍പ്പെടുത്തിയിരിക്കുന്നതെന്നും ഇന്‍ഫാം ദേശീയ ചെയര്‍മാന്‍ പറഞ്ഞു. 

ഇന്‍ഫാമിന്റെ രജത ജൂബിലി ആഘോഷങ്ങളുടെ ഭാഗമായി കേരളത്തിലെ വിവിധ കാര്‍ഷികജില്ലകളിലെ 75 വയസ് കഴിഞ്ഞ കര്‍ഷകരെ ആദരിക്കുന്ന വീര്‍ കിസാന്‍ ഭൂമിപുത്ര പുരസ്‌കാര ചടങ്ങില്‍ ആമുഖ പ്രഭാഷണം നടത്തുകയായിരുന്നു അദ്ദേഹം.

ഇന്‍ഫാമിന്റെ കേരളത്തിലെ വിവിധ കാര്‍ഷികജില്ലകളില്‍ നിന്നുള്ള 75 വയസ് കഴിഞ്ഞ  921 കര്‍ഷകര്‍ക്കാണു വീര്‍ കിസാന്‍ ഭൂമിപുത്ര പുരസ്‌കാരം നല്‍കിയത്.