ഹൃദ്രോഗ ചികിത്സയില്‍ ചരിത്രം കുറിച്ച് തൃശ്ശൂര്‍ ജനറല്‍ ആശുപത്രി. അപൂര്‍വ ഹൃദയ ശസ്ത്രക്രിയ വിജയകരം

തൃശൂര്‍: ഹൃദ്രോഗ ചികിത്സയില്‍ ചരിത്ര അധ്യായം കുറിച്ച് തൃശ്ശൂര്‍ ജനറല്‍ ആശുപത്രിയിലെ കാര്‍ഡിയോളജി വിഭാഗം.

48 വയസ്സ് പ്രായമുള്ള സ്ത്രീയ്ക്കാണ് ഈ ആശുപത്രിയില്‍ അട്രിയല്‍ സെപ്റ്റല്‍ ഡിഫെക്ട് (എഎസ്ഡി) ഡിവൈസ് ക്ലോഷര്‍ എന്ന ഹൃദയ ശസ്ത്രക്രിയ വിജയകരമായി നടത്തിയത്. 

ജന്മനാ ഹൃദയ ഭാഗത്ത് ഉണ്ടാകുന്ന ദ്വാരത്തെ ഒരു ഉപകരണം വെച്ച് അടയ്ക്കുന്ന അപൂര്‍വമായിട്ടുള്ള ശസ്ത്രക്രിയയാണ് എഎസ്ഡി ഡിവൈസ് ക്ലോഷര്‍. കീഹോള്‍ വഴിയാണ് ഇത് ചെയ്തിട്ടുള്ളത്.

2022 ഏപ്രില്‍ 20 ന് ആരംഭിച്ച തൃശ്ശൂര്‍ ജനറല്‍ ആശുപത്രിയിലെ കാത്ലാബില്‍ ഇതുവരെ 3,500 ഓളം ശസ്ത്രക്രിയ വിജയകരമായി പൂര്‍ത്തീകരിച്ചു.

കണ്‍സള്‍ട്ടന്റ് കാര്‍ഡിയോളജിസ്റ്റുമാരായ ഡോ. എ കൃഷ്ണകുമാര്‍, ഡോ. വിവേക് തോമസ് എന്നിവര്‍ ശസ്ത്രക്രിയ നയിച്ചു.

ഡോ. ആദര്‍ശ്, ഡോ. അശ്വതി, കാത്ലാബ് ടെക്നീഷ്യന്‍മാരായ ദിവ്യ, ശ്രീലക്ഷ്മി, നഴ്സിങ് ഓഫീസര്‍മാരായ ജിന്റോ, ശ്രുതി, ഷഹീദ എന്നിവരടങ്ങിയ സംഘത്തിന്റെ കഠിന പ്രയത്നമാണ് വിജയ പൂര്‍ത്തീകരണത്തിന് പിന്നില്‍.

ഈ സമ്പൂര്‍ണ പ്രൊസീജ്യര്‍ ഡോ. ആന്റണി പത്താടന്‍ പ്രോക്ട് ചെയ്ത് വിവിധ ഘട്ടങ്ങളില്‍ നിര്‍ദ്ദേശങ്ങളും പിന്തുണയും നല്‍കി വിജയത്തിലേക്ക് നയിച്ചു.

ആശുപത്രി സൂപ്രണ്ട് ഡോ. താജ് പോള്‍ പണയ്ക്കല്‍ എല്ലാ സംവിധാനങ്ങളും പിന്തുണയും ഉറപ്പാക്കിയതിലൂടെ ഉയര്‍ന്ന നിലവാരമുള്ള ചികിത്സ വിജയകരമാക്കാന്‍ നിര്‍ണായകമായ പങ്ക് വഹിച്ചു.

നമ്മുടെ സര്‍ക്കാര്‍ ആശുപത്രികളിലുള്ള വൈദ്യസങ്കേതങ്ങളും ആരോഗ്യപ്രവര്‍ത്തകരുടെ സമര്‍പ്പണവും കൊണ്ടാണ് ഇത്തരത്തിലുള്ള നേട്ടങ്ങള്‍ സാധ്യമാകുന്നതെന്ന് ഡോ. എ. കൃഷ്ണകുമാര്‍ പറഞ്ഞു.