മുക്കോലയിലെ ബാര്‍ ഹോട്ടലില്‍ റൂം ബുക്കിംഗിന്റെ പേരില്‍ നിരവധി പേരില്‍ നിന്നും പണം തട്ടിയെടുത്ത ജീവനക്കാരന്‍ പിടിയില്‍

തിരുവനന്തപുരം: മുക്കോലയിലെ ബാര്‍ ഹോട്ടലില്‍ റൂം ബുക്കിംഗിന്റെ പേരില്‍ നിരവധി പേരില്‍ നിന്നും പണം തട്ടിയെടുത്ത ജീവനക്കാരന്‍ പിടിയില്‍. തൃശ്ശൂര്‍ തുറവൂര്‍ ഐഡിക്കല്‍ ഹൗസില്‍ നോയല്‍ (22) നെയാണ് വിഴിഞ്ഞം പൊലീസ് അറസ്റ്റു ചെയ്തത്.

 ഹോട്ടലിലെ റിസപ്ഷനിസ്റ്റ് ആയിരുന്ന പ്രതി റൂം ബുക്കിംഗിനായി ബന്ധപ്പെടുന്നവര്‍ക്ക് ഹോട്ടല്‍ നമ്പര്‍ എന്ന വ്യാജേന സ്വന്തം ഗൂഗിള്‍ പേ നമ്പര്‍ നല്‍കിയാണ് തട്ടിപ്പ് നടത്തിയത്.

പലരില്‍ നിന്നുമായി 50,000 രൂപയോളം തട്ടിയെടുത്ത ശേഷമാണ് നോയല്‍ മുങ്ങിയത്. റൂം ബുക്ക് ചെയ്തവര്‍ ഹോട്ടലില്‍ എത്തിയപ്പോഴാണ് തങ്ങള്‍ കബളിപ്പിക്കപ്പെട്ട വിവരം അറിയുന്നത്. ഹോട്ടല്‍ ഉടമ നല്‍കിയ പരാതിയെ തുടര്‍ന്ന് പൊലീസ് നടത്തിയ അന്വേഷണത്തില്‍ തൃശ്ശൂരിലെ വീട്ടില്‍ നിന്നുമാണ് പ്രതിയെ പിടികൂടിയത്. 

അക്കൗണ്ടില്‍ ലഭിക്കുന്ന പണം ഷെയര്‍ മാര്‍ക്കറ്റില്‍ നിക്ഷേപിക്കുകയായിരുന്നെന്നാണ് ഇയാള്‍ പൊലീസിനോട് പറഞ്ഞത്. സംഭവത്തില്‍ വിശദമായ അന്വേഷണം നടത്തി വരികയാണെന്ന് പൊലീസ് പറഞ്ഞു.