ഇടുക്കിയിലേക്ക് വൈകാതെ ട്രെയിൽ എത്തിയേക്കും. ഡിൻഡി​ഗൽ ലോവർക്യാമ്പ് റെയിൽപാതയുടെ സർവേ നടപടികൾക്ക് റെയിൽവേ മന്ത്രാലയത്തിന്റെ അനുമതി. 2021 മുതലുള്ള ഡീൻ കുര്യാക്കോസ് എംപിയുടെ ശ്രമങ്ങൾ ഫലം കണ്ടു

ഇടുക്കി: ഏറെ നാളത്തെ കാത്തിരിപ്പിനൊടുവിൽ ഇടുക്കിയിലേക്ക് ട്രെയിൻ എത്തുന്നു. ഡിൻഡി​ഗൽ ലോവർക്യാമ്പ് റെയിൽപാതയുടെ സർവേ നടപടികൾക്കും പഠനറിപ്പോർട്ട് തയ്യാറാക്കുന്നതിനും റെയിൽവേ മന്ത്രാലയം അനുമതി നൽകിയതോടെയാണ് പ്രതീക്ഷ ഉയർന്നത്. 2021 മുതലുള്ള ഡീൻ കുര്യാക്കോസ് എംപിയുടെ ശ്രമങ്ങൾക്കാണ് ഇതോടെ ഫലം കണ്ടത്. 

കേന്ദ്ര റെയിൽവേ മന്ത്രി അശ്വനി വൈഷ്ണവാണ് പാതയുടെ അനുമതി വിവരം ലോക്സഭയിൽ അറിയിച്ചത്. പദ്ധതി യാഥാർത്ഥ്യമായാൽ ഇടുക്കിയുടെ ടൂറിസം - വ്യാപാര മേഖലയിൽ വൻ കുതിച്ചുചാട്ടമുണ്ടാകും. കുമളി വരെയാണ് പാത.

ശബരി റെയിൽപാത അനിശ്ചിതത്വത്തിലായ സാഹചര്യത്തിൽ, നിരന്തരമായ ഇടപെടലിലൂടെ ഇടുക്കി എംപി ഡീൻ കുര്യാക്കോസ് നടത്തിയ ശ്രമങ്ങളുടെ ഫലമായാണ് ഇപ്പോൾ കേന്ദ്രം പച്ചക്കൊടി കാട്ടിയിരിക്കുന്നത്.

സർവേ അനുമതി ലഭിച്ചതാണെങ്കിലും പ്രവർത്തനം തുടങ്ങിയിരുന്നില്ല. ഇതു സംബന്ധിച്ച നീക്കങ്ങൾ 2021ൽ തുടങ്ങിയതുമാണ്. 

തമിഴ്നാടുമായുള്ള ബന്ധം ശക്തമാകുന്നതിനൊപ്പം വ്യാപാരവും സു​ഗമമാകും. കൂടാതെ തമിഴ്നാട്ടിൽ നിന്നുള്ള സന്ദർശകർ കൂടുതൽ എത്തുന്നതോടെ ഇടുക്കിയുടെ ടൂറിസവും വളരും. പദ്ധതി യാഥാർത്ഥ്യമാവുന്നതോടെ ശബരിമല തീർഥാടകർക്കും യാത്ര സു​ഗമമാകും.