വീടിന് മുന്നില്‍ പാര്‍ക്ക് ചെയ്ത ഇന്നോവ ക്രിസ്റ്റ കാറും 2 സ്‌കൂട്ടറുകളും ബുള്ളറ്റും കത്തിച്ചു. വീട്ടുടമയുടെ  ബന്ധുവാണ് പ്രതി. കുടുംബ വഴക്കാണ് വാഹനങ്ങള്‍ക്ക് തീയിടാന്‍ കാരണം

കൊച്ചി : വീടിന് മുന്നില്‍ പാര്‍ക്ക് ചെയ്ത വാഹനങ്ങള്‍ കത്തിച്ച കേസിലെ പ്രതി അറസ്റ്റില്‍. വലിയ വേളി മണക്കാട്ടില്‍ പുത്തന്‍ വീട്ടില്‍ സജിത് (38) ആണ് തുമ്പ പൊലീസിന്റെ പിടിയിലായത്. 

ഇന്നലെ വെളുപ്പിനാണ് കുളത്തൂര്‍ കോരാളം കുഴിയില്‍ ഗീതു ഭവനില്‍ രാകേഷിന്റെ വീടിന് മുന്നില്‍ പാര്‍ക്ക് ചെയ്തിരുന്ന വാഹനങ്ങള്‍ കത്തി നശിച്ചത്. ഇന്നോവ ക്രിസ്റ്റ കാറും രണ്ട് സ്‌കൂട്ടറുകളും ബുള്ളറ്റും സൈക്കിളും കത്തി നശിച്ചു. 

പൊട്ടിത്തെറി ശബ്ദം കേട്ട് വീട്ടുകാര്‍ പുറത്തിറങ്ങിയപ്പോഴാണ് വാഹനങ്ങള്‍ കത്തുന്നത് കണ്ടത്. വീട്ടുടമയായ രാകേഷിന്റെ ബന്ധുവാണ് പ്രതിയായ സജിത്. കുടുംബ വഴക്കാണ് വാഹനങ്ങള്‍ക്ക് തീയിടാന്‍ കാരണമെന്നാണ് വിവരം. 

രാത്രി രണ്ട് മണിയോടെ ഇവിടെയെത്തിയ പ്രതി പെട്രോള്‍ ഒഴിച്ച് തീ കൊളുത്തുകയായിരുന്നു. വീട്ടുകാരില്‍ നിന്നും ലഭിച്ച വിവരവും സിസിടിവികളും കേന്ദ്രീകരിച്ച് നടത്തിയ അന്വേഷണത്തിലാണ് പ്രതി പിടിയിലായത്. ഇയാളെ നാളെ കോടതിയില്‍ ഹാജരാക്കും.