വീട്ടിൽ പ്രസവിച്ച യുവതിക്കും കുഞ്ഞിനും രക്ഷകരായി കനിവ് 108 ആംബുലൻസ് ജീവനക്കാർ

തിരുവനന്തപുരം: വീട്ടിൽ പ്രസവിച്ച യുവതിക്കും കുഞ്ഞിനും രക്ഷകരായി കനിവ് 108 ആംബുലൻസ് ജീവനക്കാർ. തിരുവനന്തപുരം നെയ്യാറ്റിൻകര വഴുതൂരിൽ താമസിക്കുന്ന 37 വയസ്സുകാരിയാണ് വീട്ടിൽ പെൺകുഞ്ഞിന് ജന്മം നൽകിയത്.  

വെള്ളിയാഴ്ച പുലർച്ചെ നാലരയോടെയാണ് സംഭവം.  വയറുവേദന അനുഭവപ്പെട്ട യുവതി ബാത്‌റൂമിൽ പോകവേ ഇവിടെ വെച്ച് കുഞ്ഞിന് ജന്മം നൽകുകയായിരുന്നു. ഉടൻ വീട്ടുകാർ കനിവ് 108 ആംബുലൻസിന്റെ സേവനം തേടി. കൺട്രോൾ റൂമിൽ നിന്ന് അത്യാഹിത സന്ദേശം നെയ്യാറ്റിൻകര ജനറൽ ആശുപത്രിയിലെ കനിവ് 108 ആംബുലൻസിന് കൈമാറി. 

ആംബുലൻസ് പൈലറ്റ് കിരൺ യൂ.എസ്, എമർജൻസി മെഡിക്കൽ ടെക്നീഷ്യൻ പ്രദീപ് ആർ എന്നിവർ സ്ഥലത്തെത്തി. ഉടൻ പ്രദീപ് അമ്മയ്ക്കും കുഞ്ഞിനും  വേണ്ട പ്രഥമ ശുശ്രൂഷ നൽകി ഇരുവരെയും ആംബുലൻസിലേക്ക് മാറ്റി.

ഉടൻ ആംബുലൻസ് പൈലറ്റ് കിരൺ ഇരുവരെയും നെയ്യാറ്റിൻകര ജനറൽ ആശുപത്രിയിലും തുടർന്ന് എസ്.എ.ടി ആശുപത്രിയിലും എത്തിച്ചു. അമ്മയും കുഞ്ഞും സുഖമായി ഇരിക്കുന്നതായി ആശുപത്രി അധികൃതർ അറിയിച്ചു.