കാട്ടാന ആക്രമണത്തിൽ ആദിവാസി ദമ്പതികൾ കൊല്ലപ്പെട്ട സംഭവം. പ്രതിഷേധവുമായി നാട്ടുകാർ. മൃതദേഹം ഇതുവരെ ആശുപത്രിയിലേക്ക് മാറ്റാനായിട്ടില്ല. വനം മന്ത്രി നാളെ സംഭവസ്ഥലം സന്ദർശിക്കും

കണ്ണൂർ: ആറളം ഫാമിൽ കാട്ടാന ആക്രമണത്തിൽ ആദിവാസി ദമ്പതികൾ കൊല്ലപ്പെട്ട സംഭവത്തിൽ പ്രതിഷേധം ശക്തമാവുന്നു. നാട്ടുകാരാണ് പ്രതിഷേധവുമായി രം​ഗത്തെത്തിയത്. 

കാട്ടാന ആക്രമണം നടന്നെന്ന് വിവരം ലഭിച്ചതിനു പിന്നാലെ വനം വകുപ്പ് ഉദ്യോഗസ്ഥര്‍ സ്ഥലത്തെത്തിയെങ്കിലും മൃതദേഹം മാറ്റാന്‍ നാട്ടുകാര്‍ സമ്മതിച്ചില്ല.

വിവരമറിഞ്ഞെത്തിയ സണ്ണി ജോസഫ് എംഎല്‍എ, ഇരിട്ടി ബ്ലോക്ക് പഞ്ചായത്ത് പ്രസിഡന്റ് കെ വേലായുധന്‍, പഞ്ചായത്ത് പ്രസിഡന്റ് കെപി രാജേഷ്, ബ്ലോക്ക്, അംഗം വി ശോഭ, വാര്‍ഡ് മെമ്പര്‍ മിനി എന്നിവരും സ്ഥലത്തെത്തി പ്രതിഷേധം ശമിപ്പിക്കാൻ നോക്കിയെങ്കിലും അതും ഫലം കണ്ടില്ല.

ആറളം എസ്എച്ച്ഒ ആന്‍ഡ്രിക് ഡൊമിക്കിന്റെ നേതൃത്വത്തില്‍ പൊലീസിനും ജനങ്ങളുടെ പ്രതിഷേധത്തെ നിയന്ത്രിക്കാനായില്ല.

അതിനിടെ സണ്ണി ജോസഫ് എംഎല്‍എ വനമന്ത്രിയുമായി സംസാരിച്ച് ആവശ്യമായ മുന്‍കരുതല്‍ എടുക്കാമെന്ന് നാട്ടുകാര്‍ക്ക് ഉറപ്പു നല്‍കിയെങ്കിലും പ്രതിഷേധക്കാര്‍ വഴങ്ങിയില്ല.

രാത്രി വൈകിയും പ്രതിഷേധം തുടരുകയാണ്. മൃതദേഹം ആംബുലന്‍സില്‍ കയറ്റിയെങ്കിലും പ്രതിഷേധം കാരണം ഇതുവരെ സംഭവ സ്ഥലത്തു നിന്ന് മാറ്റാന്‍ സാധിച്ചിട്ടില്ല.

വനം മന്ത്രി നേരിട്ട് സ്ഥലത്തെത്തണം എന്നാണ് നാട്ടുകാരുടെ ആവശ്യം. വനം മന്ത്രി നാളെ ഇവിടം സന്ദർശിക്കും എന്നാണ് പുറത്തുവരുന്ന വിവരം. സർവകക്ഷി യോ​ഗവും വിളിച്ചിട്ടുണ്ട്.