ഇരിക്കൂറിൽ ദുരൂഹ സാഹചര്യത്തിൽ മരിച്ച ആദിവാസി യുവതിയുടെ മരണം കൊലപാതകം. മദ്യലഹരിയിൽ ഭർത്താവ് യുവതിയെ മർദ്ദിച്ചതായി കണ്ടെത്തൽ. ഭർത്താവ് കസ്റ്റഡിയിൽ

കണ്ണൂർ: കണ്ണൂർ ഇരിക്കൂർ ഊരത്തൂരിൽ ദുരൂഹ സാഹചര്യത്തിൽ മരിച്ച ആദിവാസി യുവതി രജനിയുടെ മരണം കൊലപാതകമെന്ന് കണ്ടെത്തൽ. 

കൊലപാതകവുമായി ബന്ധപ്പെട്ട് രജനിയുടെ ഭർത്താവ് ബാബുവിനെ പൊലീസ് അറസ്റ്റ് ചെയ്തിട്ടുണ്ട്. ഭർത്താവിന്റെ മർദ്ദനത്തെ തുടർന്നാണ് മരണം. മദ്യലഹരിയിൽ ബാബു രജനിയെ മർദ്ദിച്ചതായി റിപ്പോർട്ടുണ്ട്. 

ആന്തരികാവയവങ്ങൾക്കേറ്റ പരിക്കാണ് മരണ കാരണമെന്നാണ് പോസ്റ്റ്മോർട്ടം റിപ്പോർട്ട്. 

വയനാട് തവിഞ്ഞാൽ സ്വദേശിയായ രജനി ഭർത്താവിനും മക്കൾക്കുമൊപ്പം കശുവണ്ടി തോട്ടത്തിൽ ജോലിക്ക് വന്നതായിരുന്നു. കിടപ്പുമുറിയിൽ മരിച്ച നിലയിൽ കണ്ട വിവരം ഭർത്താവാണ് അടുത്തുളളവരെ ആദ്യം അറിയിച്ചത്. 

രജനിയുടെ മുഖത്ത് പരിക്കേറ്റ പാടുകളുണ്ടായിരുന്നു. ഞായറാഴ്ച രാത്രി രജനിയും ബാബുവും തമ്മിൽ വഴക്കുണ്ടായിരുന്നു. ഇതിനിടെയാണ് മർദനമേറ്റതെന്ന് പൊലീസ് പറയുന്നു.