വൈഷ്ണയ്ക്ക് വോട്ടു ചോദിച്ച് കെസി, ഒപ്പം ചൂട് ചായയും ചൂടന്‍ രാഷ്ട്രീയവും

തിരുവനന്തപുരം: ചൂട് ചായക്കൊപ്പം  ചൂടുള്ള രാഷ്ട്രീയവും പറഞ്ഞ് മുട്ടടയിലെ യുഡിഎഫ് സ്ഥാനാര്‍ത്ഥി വൈഷ്ണ സുരേഷിന് വോട്ടഭ്യര്‍ത്ഥിച്ച് എഐസിസി സംഘടനാ ചുമതലയുള്ള ജനറല്‍ സെക്രട്ടറി കെസി വേണുഗോപാല്‍ എംപി. 

തിരുവനന്തപുരം ജില്ലയിലെ ഏറ്റവും തിരക്കേറിയ കുറവന്‍കോണം ഫുഡ്‌കോര്‍ട്ട് സാക്ഷിയായത് വ്യത്യസ്തമായ തെരഞ്ഞെടുപ്പ് പ്രചാരണത്തിന്.

കേരളത്തിലെ യുവത്വം നേരിടുന്ന വിഷയങ്ങള്‍ അവരോടൊപ്പം സംവദിച്ചാണ് കെസി വേണുഗോപാല്‍ ചെറുപ്പക്കാരിയായ വെഷ്ണവയ്ക്ക് വോട്ടുതേടിയത്.

കെപിസിസി നിശ്ചയിച്ച പരിപാടികള്‍ക്ക് പുറമെയാണ് കെസി വേണുഗോപാല്‍ എംപി മുട്ടടയിലെ യുഡിഎഫ് സ്ഥാനാര്‍ത്ഥിക്ക് വേണ്ടി വോട്ടുപിടിക്കാനിറങ്ങിയത്. 

രാവിലെ 10.15 ലോടെ കുറവന്‍കോണത്തെത്തിയ കെസി വേണുഗോപാലിനെ യുഡിഎഫ് സ്ഥാനാര്‍ത്ഥികളായ ശബരിനാഥനും വൈഷ്ണയും കോണ്‍ഗ്രസ് പ്രവര്‍ത്തകരും ചേര്‍ന്ന് സ്വീകരിച്ചു. 

രാവിലെ തിരക്കേറിയ ഫുഡ് കോര്‍ട്ടില്‍ ഭക്ഷണം കഴിക്കാനെത്തിയ സിവില്‍ സര്‍വീസ് പരിശീലകരായ വിദ്യാര്‍ത്ഥികളോട് അവരുടെ പ്രശ്‌നങ്ങള്‍ കെസി വേണുഗോപാല്‍ ചോദിച്ചറിഞ്ഞു.

അതിന് ശേഷം ആ ഭാഗത്തെ കടകളും വീടുകളും സ്ഥാനാര്‍ത്ഥികളോടൊപ്പം സന്ദര്‍ശിച്ച് യുഡിഎഫിനായി വോട്ടഭര്‍ത്ഥിച്ചു. 

ഏകദേശം അരമണിക്കൂറിലേറെ സമയം അവിടെ ചെലവഴിച്ച ശേഷമാണ് മറ്റുപരിപാടികളില്‍ പങ്കെടുക്കാന്‍ കെസി വേണുഗോപാല്‍ മടങ്ങിയത്.