അവധിക്കാലം ആഘോഷിക്കാന്‍ വീട് അടച്ചുപൂട്ടി യാത്ര പോകുവാണോ ? എങ്കില്‍ ഇക്കാര്യം ശ്രദ്ധിച്ചാല്‍ നന്ന് ! പൊലീസിന്റെ നിര്‍ദ്ദേശം

തിരുവനന്തപുരം: വീട് അടച്ചുപൂട്ടി യാത്ര പോകുന്നവര്‍ക്ക് നിര്‍ദ്ദേശവുമായി കേരള പൊലീസ്. വീട് പൂട്ടി യാത്രപോകുന്നവർക്ക് അക്കാര്യം പൊലീസിനെ അറിയിക്കാൻ പോലീസിന്റെ ഔദ്യോഗിക മൊബൈൽ ആപ്പ് ആയ പോൽ ആപ്പിലെ 'Locked House' സൗകര്യം വിനിയോഗിക്കാം. വീട് സ്ഥിതി ചെയ്യുന്ന ഭാഗങ്ങളിൽ പ്രത്യേക നിരീക്ഷണം നടത്തുമെന്ന് പൊലീസ് അറിയിച്ചു.

യാത്ര പുറപ്പെടുന്നതിനു 48 മണിക്കൂർ മുൻപെങ്കിലും ആപ്പിലൂടെ വിവരം രജിസ്റ്റർ ചെയ്യണം. ഏഴു ദിവസം മുമ്പ് വരെ വിവരം പൊലീസിനെ അറിയിക്കാവുന്നതാണ്. പരമാവധി 14 ദിവസം വരെ വീടും പരിസരവും പൊലീസിന്റെ  നിരീക്ഷണത്തിലായിരിക്കും. 

യാത്രപോകുന്ന ദിവസം, വീട് സ്ഥിതി ചെയ്യുന്ന ലൊക്കേഷൻ, വീട്ടുപേര്, വീടിനു സമീപത്തുള്ള ബന്ധുക്കളുടെയോ  അയൽവാസികളുടെയോ പേരും ഫോൺ നമ്പറും എന്നിവ ആപ്പിൽ നൽകേണ്ടതുണ്ട്.  ഗൂഗിൾപ്ലേ സ്റ്റോറിലും ആപ്പ് സ്റ്റോറിലും പോൽ ആപ്പ് ലഭ്യമാണ്.