ആർഎസ്എസ് മുഖപത്രമായ കേസരി ലേഖനത്തിനെതിരെ രൂക്ഷവിമർശനവുമായി സിറോ മലബാർ സഭ

കൊച്ചി:  ഛത്തീസ്ഗഢിൽ കന്യാസ്ത്രീകളെ അറസ്റ്റ് ചെയ്തതിനെ തുടർന്ന് രഹസ്യമായി നടന്നിരുന്ന മതപരിവർത്തനം വെളിച്ചത്തുവന്നുവെന്ന് ആർഎസ്എസ് മുഖപത്രമായ കേസരി വാരികയിൽ വന്ന ലേഖനത്തിനെതിരെ സിറോ മലബാർ സഭ രംഗത്ത്. കേരളത്തിലെ തദ്ദേശ സ്വയംഭരണ തിരഞ്ഞെടുപ്പിന് മുന്നോടിയായി ബിജെപി ക്രിസ്ത്യൻ സമൂഹത്തെ തങ്ങളിലേക്ക് അടുപ്പിക്കാൻ ശ്രമിക്കുന്ന സാഹചര്യത്തിൽ സഭയും ആർഎസ്എസും തമ്മിലുള്ള ഈ തർക്കം ബിജെപിയെ പ്രതിരോധത്തിലാക്കും. 

‘ഹിന്ദു ഫാസിസം അവസാനിപ്പിക്കുക’ എന്ന ചിത്രത്തോടൊപ്പം ഒരു പ്രസ്താവനയുമായിട്ടാണ് സിറോ മലബാർ സഭ ഈ വിഷയത്തിൽ പ്രതികരിച്ചത്. ഹിന്ദു ആത്മീയ നേതാക്കൾക്കും ഗുരുക്കന്മാർക്കും പാശ്ചാത്യ രാജ്യങ്ങളിൽ തങ്ങളുടെ ആശയങ്ങൾ പ്രചരിപ്പിക്കാനും ക്ഷേത്രങ്ങൾ സ്ഥാപിക്കാനും വിദേശ സംഭാവനകൾ സ്വീകരിക്കാനും സ്വാതന്ത്ര്യമുള്ളപ്പോൾ ക്രിസ്ത്യാനികൾക്കും മറ്റ് മതവിഭാഗങ്ങൾക്കും ഇന്ത്യയിൽ സമാനമായ സ്വാതന്ത്ര്യം നിഷേധിക്കുന്നത് എന്ത് ധാർമ്മികമോ നിയമപരമോ ആയ കാര്യങ്ങളാലാണെന്ന് സഭ ചോദിച്ചു.