ട്രെയിനിൽ ടിക്കറ്റില്ലാതെ യാത്ര ചെയ്തത് ചോദ്യം ചെയ്ത ടിടിഇക്കും പൊലീസുദ്യോ​ഗസ്ഥനും യാത്രക്കാരന്റെ മർദനം. ആക്രമി പൊലീസ് കസ്റ്റഡിയിൽ

കൊച്ചി: ട്രെയിനിൽ ടിക്കറ്റില്ലാതെ യാത്ര ചെയ്തത് ചോദ്യം ചെയ്ത ടിടിഇക്കും പൊലീസുകാരനും യാത്രക്കാരന്റെ മർദനം. തിരുവനന്തപുരം - മംഗളൂരു മാവേലി എക്സ്പ്രസിലാണ് അതിക്രമം. ആക്രമിയെ പൊലീസ് അറസ്റ്റ് ചെയ്തു. മട്ടാഞ്ചേരി സ്വദേശി ഷാഹിൽ ആണ് അറസ്റ്റിലായത്.

ഞായറാഴ്ച രാത്രി 10.30ഓടെയാണ് സംഭവം. ട്രെയിൻ ചേർത്തല സ്റ്റേഷന് സമീപം എത്തിയപ്പോൾ മദ്യപിച്ച നിലയിൽ എസ് 9 കോച്ചിൽ ഷാഹിൽ യാത്ര ചെയ്യുന്നതായി കണ്ടെത്തിയെന്ന് പൊലീസ് പറഞ്ഞു. 

ടിക്കറ്റ് ഹാജരാക്കാൻ ടിടിഇ ആവശ്യപ്പെട്ടു. എന്നാൽ പ്രതി അദ്ദേഹത്തോട് മോശമായി പെരുമാറുകയും ആക്രമിക്കുകയും ചെയ്തു.

തുടർന്ന് ആക്രമത്തിന്റെ വിവരം ടിടിഇ ട്രെയിനിലുണ്ടായിരുന്ന റെയിൽവേ പൊലീസ് ഉദ്യോഗസ്ഥനെ അറിയിച്ചു. ഇതറിഞ്ഞ് കോച്ചിലെത്തിയ പൊലീസ് ഉദ്യോഗസ്ഥനെ ഷാഹിൽ അധിക്ഷേപിക്കുകയും ആക്രമിക്കുകയും തള്ളുകയും ചെയ്തു. പൊലീസ് ഉദ്യോഗസ്ഥന് കൈത്തണ്ടയിലും കൈമുട്ടിലും പരിക്കേറ്റു.

തുടർന്ന് കൂടുതൽ പൊലീസ് ഉദ്യോ​ഗസ്ഥരെത്തി ഷാഹിലിനെ കീഴ്പ്പെടുത്തുകയായിരുന്നു. ട്രെയിൻ എറണാകുളം ജംഗ്ഷനിൽ എത്തിയ ഉടനെ അദ്ദേഹത്തെ റെയിൽവേ പൊലീസ് സ്റ്റേഷനിലേക്ക് കൊണ്ടുപോയി. 

ചോദ്യം ചെയ്തതിന് ശേഷം ബിഎൻഎസിലെ പ്രസക്തമായ വകുപ്പുകൾ പ്രകാരം കേസ് രജിസ്റ്റർ ചെയ്തു. അറസ്റ്റ് രേഖപ്പെടുത്തിയ ശേഷം ഷാഹിലിനെ കോടതിയിൽ ഹാജരാക്കി ജുഡീഷ്യൽ കസ്റ്റഡിയിൽ വിട്ടു.

‌