ഉദ്ഘാടനത്തിന് തയ്യാറായി പെരുമ്പളം പാലം. പതിനായിരത്തോളം ജനങ്ങള്‍ക്കായി നൂറ് കോടിരൂപയുടെ പദ്ധതി. പെരുമ്പളം ദ്വീപിലെത്താൻ പാലം തുറക്കുന്നതോടെ ബസ് അനുവദിക്കാൻ കെ എസ് ആർ ടി സി

കൊച്ചി : 2019 സെപ്തംബര്‍ മാസത്തില്‍ മുഖ്യമന്ത്രി പിണറായി വിജയന്‍ ശിലാസ്ഥാപനം നടത്തി നിര്‍മ്മാണം തുടങ്ങിയ പെരുമ്പളം പാലം ഉദ്ഘാടനത്തിന് തയ്യാറെടുക്കുന്നു.

 പെരുമ്പളം ദ്വീപിലെ ജനങ്ങൾ ബോട്ടും ജങ്കാറുമാണ് ദ്വീപിലെത്താൻ ആശ്രയിച്ചിരുന്നത്.

പാലം യാഥാർത്ഥ്യമാകുന്നതോടെ ദ്വീപ് നിവാസികൾക്ക് അതൊരു പുതിയ അനുഭവമാകും . 

ആലപ്പുഴ ജില്ലയിലെ അരൂർ നിയോജക മണ്ഡലത്തിൽ വേമ്പനാട് കായലിലാണ് പെരുമ്പളം ദ്വീപ് സ്ഥിതി ചെയ്യുന്നത്.

ശാന്തമായ കായൽ യാത്ര, ദ്വീപ് ഭംഗി, ഗ്രാമീണ ജീവിതം, പച്ചപ്പ് എന്നിങ്ങനെ പ്രകൃതി സൗന്ദര്യം തേടിയെത്തുന്നവർക്ക് ഏറ്റവും മികച്ച ഇടമാണ് പെരുമ്പളം ദ്വീപ്.

2021ല്‍ രണ്ടാം പിണറായി സര്‍ക്കാര്‍ അധികാരത്തില്‍ വരുമ്പോള്‍ 

സ്ഥലമെടുപ്പുമായി ബന്ധപ്പെട്ടുകൊണ്ടുള്ള നിരവധി പ്രശ്നങ്ങൾ ഉയർന്ന് വന്നു. അതൊക്കെ പരിഹരിച്ച് ഭൂമി വിട്ടു നൽകിയവർക്ക് നഷ്ടപരിഹാരത്തുക കൃത്യമായി നൽകുന്നതിനുള്ള നടപടികൾ സ്വീകരിക്കുകയും ചെയ്തു.

അരൂക്കുറ്റിയിൽ നിന്നുള്ള കെഎസ്ഇബിയുടെ വൈദ്യുത ലൈനുകൾ സ്ഥാപിക്കുന്നതുമായി ബന്ധപ്പെട്ടും അപ്പ്രോച്ച് റോഡുകൾ നിർമ്മിക്കുന്ന ഇടങ്ങളിലെ പ്രയാസങ്ങളും പാലം നിർമ്മാണത്തിൽ തടസ്സങ്ങളായി മാറുമെന്ന് കരുതി .

എന്നാൽ എം.എൽ.എ ദലീമയുടെ ഭാഗത്ത് നിന്നുമുണ്ടായ ഫലപ്രദമായ ഇടപെടലുകളിലൂട ആ പ്രശ്നങ്ങൾ പരിഹരിക്കാൻ കഴിഞ്ഞു.

അപ്പ്രോച്ച് റോഡുകൾക്കായി ആയിരക്കണക്കിന് തെങ്ങുകുറ്റികൾ സ്ഥാപിച്ചുകൊണ്ട് പ്രത്യേക സംവിധാനം ഒരുക്കിയാണ് റോഡ് നിർമ്മാണം പൂർത്തീകരിച്ചത്.

പാലം നിർമ്മാണത്തിൻ്റെ കരാർ കമ്പനി ഊരാളുങ്കൽ ലേബർ കോൺട്രാക്ട് കോർപ്പറേറ്റ് സൊസൈറ്റിയാണ്.

 പൊതുമരാമത്ത് വകുപ്പ് മന്ത്രി മുഹമ്മദ് റിയാസ് നിർമ്മാണ സ്ഥലത്ത് എത്തുകയും നിർമ്മാണ പുരോഗതി വിലയിരുത്തുകയും ആവശ്യമായ നിർദ്ദേശങ്ങൾ നൽകുകയും ചെയ്തു.

 പാലം പൂർത്തിയാകുമ്പോൾ പെരുമ്പളത്തേക്ക് കെഎസ്ആർടിസി സർവീസ് വേണമെന്ന ആവശ്യം ഗതാഗത വകുപ്പ് മന്ത്രി കെ ബി ഗണേഷ് കുമാറിനെ എം.എൽ.എ ദലീമ അറിയിച്ചിട്ടുണ്ട്.

ദ്വീപിലേക്ക് പാലം പൂർത്തിയാകുമ്പോൾ ബസ് അനുവദിക്കുമെന്ന് മന്ത്രി ഉറപ്പു നൽകുകയും അതിനായി ഉദ്യോഗസ്ഥർ സന്ദർശിച്ച് റിപ്പോർട്ട് തയ്യാറാക്കി നടപടിക്രമങ്ങൾ പൂർത്തീകരിക്കുകയും ചെയ്തിട്ടുണ്ട്. 

2026 മാർച്ച് ആദ്യവാരമായിരിക്കും പാലത്തിൻ്റെ ഉദ്ഘാടനം .