വയലാറുമായി താരതമ്യപ്പെടുത്തുന്നതിനോട് പ്രതികരിക്കാനില്ല, നടക്കുന്നത് സംഘടിത ആക്രമണം: വേടൻ

കൊച്ചി: തനിക്ക് എതിരെ സംഘടിതമായ ആക്രമണം നടക്കുന്നുവെന്ന് റാപ്പർ വേടൻ. മികച്ച ഗാനരചയിതാവിനുള്ള സംസ്ഥാന ചലച്ചിത്ര പുരസ്കാരം വേടന് ലഭിച്ചതിന് പിന്നാലെ വലിയ തോതിലുള്ള വിമർശനങ്ങളാണ് ഉയരുന്നത്. താൻ മുന്നോട്ട് വയ്ക്കു‌ന്ന രാഷ്ട്രീയമാണ് ഇത്തരക്കാരുടെ പ്രശ്നമെന്ന് വേടൻ അഭിപ്രായപ്പെട്ടു.

'മഞ്ഞുമ്മൽ ബോയ്‌സ്' എന്ന ചിത്രത്തിലെ 'കുതന്ത്രം' എന്ന ഗാനത്തിനാണ് വേടന് അവാർഡ് ലഭിച്ചത്. പുരസ്കാര പ്രഖ്യാപനത്തിന് പിന്നാലെ വരികളുടെ ലാവണ്യത്തെ ചൂണ്ടിക്കാട്ടി പലതരത്തിലുള്ള വിമർശനങ്ങളും ഉയർന്നു. വയലാർ രാമവർമ ഉള്‍പ്പെടെയുള്ള അനശ്വര ഗാനരചയിതാക്കളുമായി താരതമ്യപ്പെടുത്തിയായിരുന്നു വിമർശനം.

എന്നാൽ, വയലാറിനെയും തന്നെയും താരതമ്യം ചെയ്യുന്നതിനോട് പ്രതികരിക്കാൻ ഇല്ലെന്ന് വേടന്‍ പറഞ്ഞു. സംഗീതം മാറുകയാണ്. അതിനുള്ള അംഗീകാരമായി പുരസ്കാര നേട്ടത്തെ കാണുന്നു. അവാർഡ് ഉറപ്പായും സ്വീകരിക്കുമെന്നും വേടന്‍ വ്യക്തമാക്കി.