ഹൈക്കോടതി റൂട്ടില്‍ കൊച്ചി മെട്രോ ഇലക്ട്രിക് ബസ് സര്‍ക്കുലര്‍ സര്‍വീസ് മാര്‍ച്ച് ആദ്യവാരം മുതല്‍. മൂന്ന് ബസുകളാണ് സര്‍വീസ് നടത്തുക. അഞ്ച് കിലോമീറ്ററിന് 20 രൂപ

കൊച്ചി: ഹൈക്കോടതി വാട്ടര്‍ മെട്രോ സ്റ്റേഷനെ കൊച്ചി മെട്രോയുമായും നഗരത്തിലെ പ്രധാന കേന്ദ്രങ്ങളുമായും ബന്ധിപ്പിക്കുന്ന ഇലക്ട്രിക് ബസ് സര്‍ക്കുലര്‍ സര്‍വ്വീസ് മാര്‍ച്ച് ആദ്യവാരം ആരംഭിക്കും.

ഹൈക്കോടതി വാട്ടര്‍ മെട്രോ സ്റ്റേഷനില്‍ നിന്നാരംഭിച്ച് ഫാര്‍മസി ജംഗ്ഷന്‍ വഴി എംജി റോഡ്, മഹാരാജാസ്, ജനറല്‍ ഹോസ്പിറ്റല്‍ വഴി ഹൈക്കോടതിയിലേക്ക് എത്തുന്ന വിധത്തിലാണ് സര്‍വ്വീസ് ക്രമീകരിച്ചിരിക്കുന്നത്. മൂന്ന് ബസുകളാണ് സര്‍വീസ് നടത്തുക.

അഞ്ച് കിലോമീറ്ററിന് 20 രൂപയാണ് നിരക്ക്. രാവിലെ എട്ട് മണി മുതല്‍ വൈകിട്ട് 8 മണിവരെ 20 മിനിറ്റ് ഇടവിട്ട് സര്‍വ്വിസുകളുണ്ടാകും. 40 ദിവസം മുമ്പ് വിവിധ റൂട്ടുകളിലായി ആരംഭിച്ച ഇലക്ടിക് ബസ് സര്‍വീസുകളില്‍ ഇതേവരെ ഒരു ലക്ഷത്തോളം പേര്‍ യാത്ര ചെയ്തു. 

ആലുവ- സിയാല്‍ എയര്‍പോര്‍ട്ട്, കളമശേരി - മെഡിക്കല്‍ കോളേജ്, കളമശേരി - കുസാറ്റ്, കളമശേരി - ഇന്‍ഫോപാര്‍ക്ക്, കാക്കനാട് വാട്ടര്‍ മെട്രോ - ഇന്‍ഫോപാര്‍ക്ക്, കാക്കനാട് വാട്ടര്‍ മെട്രോ - സിവില്‍ സ്റ്റേഷന്‍ എന്നീ റൂട്ടുകളിലായി 9 ബസുകളാണ് ഇപ്പോള്‍ സര്‍വ്വീസ് നടത്തുന്നത്.