കൊലപാതക കേസില്‍ ജാമ്യത്തില്‍ ഇറങ്ങിയശേഷം വടി വാളുമായി മയക്കുമരുന്ന് കച്ചവടം, യുവാവിനെ സാഹസികമായി പിടികൂടി കോട്ടയം എക്‌സൈസ് റേഞ്ച് ടീം. മാരക മയക്കുമരുന്നായ മെത്താ ഫിറ്റാമിനും, കഞ്ചാവും, വടിവാളും പ്രതിയില്‍ നിന്നും പിടികൂടി

കോട്ടയം: കൊലപാതക കേസില്‍ ജാമ്യത്തില്‍ ഇറങ്ങിയശേഷം കാരാപ്പുഴ ഭാഗത്ത് മാരക മയക്കുമരുന്നായ മെത്ത ഫിറ്റാമിനും, കഞ്ചാവും വില്‍പ്പന നടത്തിവന്ന യുവാവിനെ സാഹസികമായി പിടികൂടി കോട്ടയം എക്‌സൈസ് റേഞ്ച് ടീം.

കോട്ടയം കാരാപ്പുഴ കരയില്‍ വാഴപ്പറമ്പ് വീട്ടില്‍ വി.ബി ആദര്‍ശ് (27) ആണ് പിടിയിലായത്. 0.7 ഗ്രാം മെത്ത ഫിറ്റാ മൈന്‍, 8 ഗ്രാം കഞ്ചാവ്, 63 സെന്റീമീറ്റര്‍ നീളമുള്ള വടിവാള്‍ എന്നിവ സഹിതം എക്‌സൈസ് ഇന്‍സ്‌പെക്ടര്‍ ഫിലിപ്പ് തോമസിന്റെ നേതൃത്വത്തിലുള്ള സംഘം കണ്ടെടുത്തു.

പട്രോളിങ്ങിനിടെ കാരാപ്പുഴ ഭാഗത്ത് വച്ച് സംശയകരമായ സാഹചര്യത്തില്‍ കാണപ്പെട്ടതിനെ തുടര്‍ന്നു നടത്തിയ പരിശോധനയിലാണ് ഇയാള്‍ എക്‌സൈസിന്റെ പിടിയിലായത്. നിരവധി ക്രിമിനല്‍ എന്‍.ഡി.പി.എസ് കേസുകളിലെ പ്രതിയാണ് ആദര്‍ശ്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

എക്‌സൈസ് ഇന്‍സ്‌പെക്ടര്‍ ഫിലിപ്പ് തോമസ്, പ്രിവെന്റിവ് ഓഫീസര്‍ രജിത് കൃഷ്ണ,സിവില്‍ എക്‌സൈസ് ഓഫീസര്‍ ദിബീഷ് , ജിഷ്ണു ശിവന്‍, വിഷ്ണു വിനോദ്, ഡ്രൈവര്‍ സിവില്‍ എക്‌സൈസ് ഓഫീസര്‍ അനസ് എന്നിവര്‍ ചേര്‍ന്നാണു പ്രതിയെ പിടികൂടിയത്.