ഇന്നു എന്തോ തോന്നി, ഒരു ക്വാർട്ടർ അടിച്ചിട്ടുണ്ട് സാറേ... ജോലിക്ക് എന്തേലും പണികിട്ടുമോ സാറേ. ഡ്യൂട്ടിക്കിടെ മദ്യപിച്ച കെഎസ്ആർടിസി കണ്ടക്ടർ പിടിയിൽ. പിടികൂടിയത് കെഎസ്ആർടിസി വിജിലൻസ് ഉദ്യോഗസ്ഥർ

കോട്ടയം: സാറേ, സത്യം പറയാലോ ഒരു ക്വാർട്ടർ അടിച്ചിട്ടുണ്ട്... ജോലിക്ക് എന്തേലും പണികിട്ടുമോ സാറേ. ഒരു തോന്നലിൽ കഴിച്ചതാ. ഒരു കുഴപ്പവും ഉണ്ടാക്കാതെ ജോലി ചെയ്തോളാം. മദ്യപിച്ച് ഡ്യൂട്ടിക്ക് എത്തി കണ്ടക്ടർ കെ.എസ്.ആർ.ടി.സി വിജിലൻസ് ഉദ്യോഗസ്ഥരോട് പറഞ്ഞ വാക്കുകളാണ്. 

ഈരാറ്റുപേട്ട - കോയമ്പത്തൂർ ഫാസ്റ്റ് പാസഞ്ചറിലെ കണ്ടക്ടർ ആർ കുമാറിനെയാണ് പിടികൂടിയത്. കോയമ്പത്തൂരിൽ നിന്നു മടങ്ങിവരുകയായിരുന്നു ബസ്. യാത്രക്കാർ വിവരം അറിയിച്ചതിനെ തുടർന്ന് വിജിലൻസ് ഉദ്യോഗസ്ഥർ കണ്ടക്ടറെ പാലക്കാട് വെച്ചാണ് പിടികൂടിയത്. 

ഉദ്യോഗസ്ഥർ ചോദ്യം ചെയ്തതോടെ കണ്ടക്ടർ മദ്യപിച്ചിട്ടുണ്ടെന്നു സമ്മതിച്ചു. ഇനി ഇത് ആവർത്തിക്കില്ലെന്ന് വിജിലൻസ് സംഘം ഉദ്യോഗസ്ഥനിൽ നിന്നും എഴുതി വാങ്ങി ഡ്യൂട്ടിയിൽ നിന്നും റിലീവ് ചെയ്തു. തുടർന്ന് അതേ ബസിൽ തന്നെ ഉദ്യോഗസ്ഥനെ ഈരാറ്റുപേട്ടയ്ക്ക് തിരിച്ചയക്കുകയും ചെയ്തു.