/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/2025/10/21/kottayam-collectorate-2025-10-21-16-04-18.jpg)
കോട്ടയം: രാഷ്ട്രപതിയുടെ കേരള സന്ദര്‍ശനവുമായി ബന്ധപ്പെട്ട് കോട്ടയത്ത് വ്യോമസേന ഹെലികോപ്റ്റര്‍ പരീക്ഷണ പറക്കല്‍ നടത്തി.
കോട്ടയം പോലീസ് പരേഡ് ഗ്രൗണ്ട്, കുമരകം, പാലാ എന്നീ ഭാഗത്തേക്കാണ് പരീക്ഷണ പറക്കല്‍ നടത്തിയത്. ഹെലികോപ്റ്റര്‍ താഴ്ന്നു പറന്നത് ജനങ്ങളിലും കൗതുകമുണര്‍ത്തി.
അതേസമയം, മഴ മേഖങ്ങള്‍ ആശങ്ക ഉയര്‍ത്തുന്നുണ്ട്. മഴ ശക്തമായാല്‍ റോഡ് മാര്‍ഗമായിരിക്കും രാഷ്ട്രപതി എത്തുക. 23- 24 തീയതികളിലായിരിക്കും രാഷ്ട്രപതി കോട്ടയത്ത് ഉണ്ടാവുക.
/filters:format(webp)/sathyam/media/media_files/2025/10/21/helicopter-kottayam-2025-10-21-16-18-17.jpg)
23ന് ശിവഗിരിയില്‍ ശ്രീനാരായണഗുരു മഹാസമാധി ശതാബ്ദി ആചരണത്തിന്റെ ഉദ്ഘാടനം നിര്‍വഹിച്ച ശേഷമാണ് വൈകിട്ട് 3.50ന് പാലാ സെന്റ് തോമസ് കോളജ് ഗ്രൗണ്ടില്‍ ഹെലികോപ്റ്ററില്‍ എത്തുക.
രാഷ്ട്രപതി 4.15ന് കോളജിന്റെ പ്ലാറ്റിനം ജൂബിലി ആഘോഷത്തിന്റെ സമാപനം ഉദ്ഘാടനം ചെയ്തശേഷം 6.20ന് കുമരകത്തെ താജ് റിസോര്‍ട്ടിലെത്തി അവിടെ താമസിക്കും. സന്ദര്‍ശനത്തിന്റെ അവസാന ദിവസം, 24ന്, രാവിലെ 11ന് കോട്ടയത്തുനിന്നു ഹെലികോപ്റ്ററില്‍ കൊച്ചിയിലേക്കു തിരിക്കും.
രാഷ്ട്രപതിയുടെ സന്ദര്‍ശനത്തോടനുബന്ധിച്ച് റോഡിലെ കുഴിയടച്ചു മിനുക്കു പണികള്‍ ചെയ്തിരുന്നു. 23-24 തീയതികളില്‍ വലിയ ഗതാഗത നിയന്ത്രണങ്ങളാണ് ജില്ലയില്‍ ഏര്‍പ്പെടുത്തിയിട്ടുള്ളത്.
ഗതാഗത നിയന്ത്രണമുള്ള 2 ദിവസവും നിശ്ചിത സമയങ്ങളില്‍ നാഗമ്പടം പ്രൈവറ്റ് ബസ് സ്റ്റാന്‍ഡ് പ്രവര്‍ത്തിക്കില്ല. ബസുകള്‍ അകത്തേക്ക് കയറ്റുകയോ ഇവിടെനിന്ന് സര്‍വീസ് ആരംഭിക്കുകയോ ചെയ്യില്ല.
തിരുനക്കര പഴയ ബസ് സ്റ്റാന്‍ഡ് പ്രവര്‍ത്തിക്കും. കോട്ടയം നഗരത്തിലും സമീപ പ്രദേശങ്ങളിലും തിരുനക്കര, കഞ്ഞിക്കുഴി, ബേക്കര്‍ ജങ്ഷന്‍, നാഗമ്പടം എന്നിവിടങ്ങളിലും ഓട്ടോ-കാര്‍-ടാക്‌സി സ്റ്റാന്‍ഡുകളും പ്രവര്‍ത്തിക്കില്ല.
കോട്ടയം കുമരകം റോഡില്‍ വശങ്ങളിലെ പാര്‍ക്കിങ്ങും പ്രധാന കവലകളിലെ ഓട്ടോ-കാര്‍-ടാക്‌സി സ്റ്റാന്‍ഡുകളും അനുവദിക്കില്ല. തട്ടുകടകളും വഴിയോര കച്ചവടവും നിരോധിച്ചിട്ടുണ്ട്.
വാഹനങ്ങള്‍ - നിയന്ത്രണങ്ങള്‍
/filters:format(webp)/sathyam/media/media_files/Y5GdQgLwiNAuX6zlGHXA.jpg)
- മെഡിക്കല്‍ കോളജ് ഭാഗത്തുനിന്നു കോട്ടയം ടൗണിലേക്കുള്ള സ്വകാര്യ ബസുകള്‍ എംസി റോഡിലെ വട്ടമൂട് പാലം വഴി തിരുവഞ്ചൂര്‍, കഞ്ഞിക്കുഴി കെകെ റോഡ് വഴി തിരുനക്കര മൈതാനം ചുറ്റി തിരുനക്കര പഴയ ബസ് സ്റ്റാന്‍ഡില്‍ എത്തണം. തിരുവഞ്ചൂരില്‍ നിന്നു വട്ടമൂട് ഭാഗത്തേക്ക് വാഹനങ്ങള്‍വിടില്ല.
- കോട്ടയത്തുനിന്നു പൊന്‍കുന്നം, കാഞ്ഞിരപ്പള്ളി, മുണ്ടക്കയം ഭാഗങ്ങളിലേക്ക് പോകേണ്ട കെഎസ്ആര്‍ടിസി ബസുകള്‍ ഐഡ ജങ്ഷന്‍, പുളിമൂട് ജങ്ഷന്‍ വഴി ശീമാട്ടി റൗണ്ടാന ചുറ്റി സെന്‍ട്രല്‍ ജംക്ഷനിലെത്തി അവിടെനിന്നു ജനറല്‍ ആശുപത്രിയുടെ മുന്‍പിലൂടെ ബസേലിയസ് കോളജ് ജങ്്ഷന്‍, കലക്ടറേറ്റ് ജങ്ഷന്‍, കഞ്ഞിക്കുഴി, മണര്‍കാട് വഴി പോകണം.
- സെന്‍ട്രല്‍ ജങ്ഷനില്‍നിന്നു കഞ്ഞിക്കുഴി ഭാഗത്തേക്കുള്ള വണ്‍വേ താല്‍ക്കാലികമായി ഒഴിവാക്കും. ഈ റോഡില്‍ കൂടി രണ്ടു വശത്തേക്കും ഗതാഗതം അനുവദിക്കും. മൂവാറ്റുപുഴ, കടുത്തുരുത്തി ഭാഗങ്ങളില്‍നിന്നു ചങ്ങനാശേരി ഭാഗത്തേക്കുള്ള വാഹനങ്ങള്‍ പട്ടിത്താനം ജങ്ഷനില്‍നിന്നു തിരിഞ്ഞ് ഏറ്റുമാനൂര്‍ - മണര്‍കാട് ബൈപ്പാസ്, പുതുപ്പള്ളി വഴി പോകണം.
- ചങ്ങനാശരി ഭാഗത്തുനിന്ന് ഏറ്റുമാനൂര്‍ ഭാഗത്തേക്കുള്ള വാഹനങ്ങള്‍ ചങ്ങനാശേരി ടൗണില്‍നിന്നു കുരിശുംമൂട്, തെങ്ങണ, ഞാലിയാകുഴി, പുതുപ്പള്ളി, മണര്‍കാട് - ഏറ്റുമാനൂര്‍ ബൈപ്പാസ് വഴി പോകണം.
- ചിങ്ങവനം ഭാഗത്തുനിന്നു കോട്ടയം ടൗണിലേക്കുള്ള വാഹനങ്ങള്‍ മാവിളങ്ങ് ജംക്ഷനില്‍നിന്നു തിരിഞ്ഞ് പാക്കില്‍, പൂവന്തുരുത്ത്, കടുവാക്കുളം, നാല്‍ക്കവല വഴി പുതുപ്പള്ളിയെത്തി പോകണം.
- ചങ്ങനാശരി ഭാഗത്തുനിന്നു കോട്ടയത്തേക്കുള്ള കെഎസ്ആര്‍ടിസി ബസുകള്‍ പുളിമൂട് ജങ്ഷനില്‍നിന്നു തിരിഞ്ഞ് കെഎസ്ആര്‍ടിസി സ്റ്റാന്‍ഡിലേക്കു പോകണം. (നിലവിലെ വഴി).
- എറണാകുളം, തൃശൂര്‍ ഭാഗങ്ങളിലേക്കു പോകേണ്ട കെഎസ്ആര്‍ടിസി ബസുകള്‍ ഐഡ ജങ്ഷന്‍, പുളിമൂട് ജങ്ഷന്‍വഴി ശീമാട്ടി റൗണ്ട് ചുറ്റി സെന്‍ട്രല്‍ ജങ്ഷനിലെത്തി കെകെ റോഡ് വഴി കലക്ടറേറ്റ് ജങഷന്‍, കഞ്ഞിക്കുഴി, മണര്‍കാട്, ഏറ്റുമാനൂര്‍ വഴി പോകണം.
- ആലപ്പുഴ, ചേര്‍ത്തല ഭാഗങ്ങളില്‍നിന്നു കോട്ടയം ടൗണിലേക്ക് പോകേണ്ട വാഹനങ്ങള്‍ ബണ്ട് റോഡില്‍ എത്തി ഇടയാഴം, കല്ലറ, നീണ്ടൂര്‍, ഏറ്റുമാനൂര്‍ വഴി പോകണം. ചേര്‍ത്തല ഭാഗത്തുനിന്നു കുമരകത്തേക്ക് വരുന്ന ബസുകള്‍ മണിയാപറമ്പ് റോഡ് ജങ്ഷനില്‍ സര്‍വീസ് നിര്‍ത്തി തിരികെപ്പോകണം.
- വൈക്കം-കുമരകം റോഡിലൂടെ കോട്ടയം ഭാഗത്തേക്ക് പോകേണ്ട വാഹനങ്ങള്‍ ഇടയാഴം ജംക്ഷനില്‍ എത്തി കല്ലറ, നീണ്ടൂര്‍ വഴി യാത്ര തുടരാം. കല്ലറ, നീണ്ടൂര്‍ ഭാഗങ്ങളില്‍നിന്നു പനമ്പാലം വഴി കോട്ടയം ടൗണിലേക്കു പോകേണ്ട വാഹനങ്ങള്‍ കുടമാളൂര്‍ കുരിശുപള്ളി ജങ്ഷനില്‍ എത്തി പുളിഞ്ചുവട്, കുമാരനല്ലൂര്‍ മേല്‍പ്പാലം വഴി പോകണം.
- ചിങ്ങവനം ഭാഗത്തുനിന്നു കോട്ടയം ടൗണിലേക്കു വരുന്ന സ്വകാര്യ ബസുകള്‍ കോടിമത സ്റ്റാന്‍ഡില്‍ സര്‍വീസ് അവസാനിപ്പിച്ചു തിരികെപ്പോകണം. ദിവാന്‍ കവലയില്‍നിന്നു കഞ്ഞിക്കുഴി ഭാഗത്തേക്കു വാഹനഗതാഗതം അനുവദിക്കില്ല. മെഡിക്കല്‍ കോളജ് ഭാഗത്തുനിന്ന് എറണാകുളം, മൂവാറ്റുപുഴ ഭാഗങ്ങളിലേക്കു പോകേണ്ട വാഹനങ്ങള്‍ മെഡിക്കല്‍ കോളജ് കുരിശുപള്ളി ജങ്ഷന്‍, അമ്മഞ്ചേരി, യൂണിവേഴ്‌സിറ്റി, അതിരമ്പുഴ വഴി അതിരമ്പുഴ ഉപ്പുപുര ജങ്ഷനിലെത്തി കോട്ടമുറി, ആനമല വഴി കാണക്കാരി ക്ഷേത്രം ജങ്്ഷനിലെത്തി യാത്ര തുടരാം.
- തൊടുപുഴപാലാകോട്ടയം പാലായില്‍നിന്നു കോട്ടയത്തേക്കുള്ള വാഹനങ്ങള്‍ പാലാ ജനറല്‍ ഹോസ്പിറ്റല്‍ ജങ്ഷനില്‍നിന്ന് പൊന്‍കുന്നം റോഡിലൂടെ പൈക, കൊഴുവനാല്‍ മറ്റക്കര, അയര്‍ക്കുന്നം വഴി പോകണം.
- തൊടുപുഴയില്‍നിന്നു കോട്ടയത്തേക്കുള്ള വാഹനങ്ങള്‍ കുറിഞ്ഞി, കൊല്ലപ്പള്ളി എന്നിവിടങ്ങളില്‍നിന്ന് തിരിഞ്ഞ് രാമപുരം വഴി യാത്ര തുടരാം.
- പാലാ ഭാഗത്തുനിന്ന് ഏറ്റുമാനൂര്‍, കോട്ടയം മെഡിക്കല്‍കോളജ്, എറണാകുളം ഭാഗത്തേക്കുള്ള വാഹനങ്ങള്‍ പാലാ സിവില്‍ സ്റ്റേഷന്‍, ആര്‍വി ജങ്ഷന്‍ തിരിഞ്ഞ് മരങ്ങാട്ടുപിള്ളി, കോഴാ, കുറവിലങ്ങാട് വഴി പോകണം. ഈരാറ്റുപേട്ടയില്‍നിന്നു കോട്ടയം, പൊന്‍കുന്നം ഭാഗത്തേക്കുള്ള വാഹനങ്ങള്‍ തിടനാട്, കാഞ്ഞിരപ്പള്ളി വഴി കെകെ റോഡിലെത്തി പോകണം. അല്ലെങ്കില്‍ ഭരണങ്ങാനം പള്ളിഭാഗത്തുനിന്നു തിരിഞ്ഞ് പൈക വഴി പോകണം.
അവശ്യ സര്‍വീസുകള്‍ വിവിധ ഭാഗങ്ങളില്‍നിന്ന് കോട്ടയം ടൗണ്‍വഴി പോകേണ്ട ആംബുലന്‍സ്, ആശുപത്രി, അത്യാവശ്യ വാഹനങ്ങള്‍ക്കായി നിര്‍ണയിച്ചിരിക്കുന്ന റൂട്ട്
- തിരുവല്ല ഭാഗത്തുനിന്നുള്ള ആംബുലന്‍സുകള്‍ ചങ്ങനാശേരി ബൈപാസ് റോഡില്‍ പ്രവേശിച്ച് തെങ്ങണ, പുതുപ്പള്ളി, മണര്‍കാട്, പൂവത്തുംമൂട്, സംക്രാന്തി വഴി മെഡിക്കല്‍കോളജ് ആശുപത്രിയില്‍ എത്തണം.
- ആലപ്പുഴ, ചേര്‍ത്തല ഭാഗങ്ങളില്‍നിന്നുള്ള ആംബുലന്‍സുകള്‍ ഇടയാഴം ജങ്ഷനിലെത്തി ഇടത്തേക്ക് തിരിഞ്ഞ് കല്ലറവഴി പോകണം. കെകെ റോഡില്‍നിന്നുള്ള ആംബുലന്‍സുകള്‍ മണര്‍കാട് എത്തി പൂവത്തുംമൂട് പാലംവഴി മെഡിക്കല്‍കോളജ് ആശുപത്രിയിലേക്ക് പോകാം.
- പാലാ, കുറവിലങ്ങാട്, എറണാകുളം ഭാഗങ്ങളില്‍നിന്നുള്ള ആംബുലന്‍സുകള്‍ ഏറ്റുമാനൂര്‍ സെന്‍ട്രല്‍ ജങ്ഷനിലെത്തി അതിരമ്പുഴ യൂണിവേഴ്‌സിറ്റി വഴി മെഡിക്കല്‍ കോളജിലേക്ക് പോകണം.
ട്രെയിന്‍ യാത്രക്കാരുടെ ശ്രദ്ധയ്ക്ക്
കോട്ടയം റെയില്‍വേ സ്റ്റേഷനില്‍നിന്ന് 23ന് വിവിധ സ്ഥലങ്ങളിലേക്ക് പോകേണ്ട യാത്രക്കാര്‍ അന്ന് ഉച്ചയ്ക്ക് 2ന് മുന്‍പായി റെയില്‍വേ സ്റ്റേഷനില്‍ എത്തണം.