കടുത്തുരുത്തി മുൻ എം.എൽ.എ പി.എം. മാത്യു അന്തരിച്ചു. മരണം ഇന്ന് പുലർച്ച പാലാ മാർ സ്ലീവാ മെഡിസിറ്റിയിൽ

കോട്ടയം: കടുത്തുരുത്തി മുൻ എം.എൽ.എ പി.എം. മാത്യു അന്തരിച്ചു. ഡിസംബർ  30 ചൊവ്വാഴ്ച  പുലർച്ചെ പാലാ മാർ സ്ലീവാ മെഡിസിറ്റിയിൽ വച്ചായിരുന്നു അന്ത്യം.

ഭൗതിക ശരീരം കടുത്തുരുത്തി കാപ്പുംതലയിലുള്ള വസതിയിൽ ഇന്ന് വൈകിട്ട് 5 മണിക്ക് കൊണ്ടുവരും. സംസ്ക്കാര ശുശ്രഷ നാളെ (ഡിസംബർ 31 ) ബുധനാഴ്ച വൈകിട്ട് 3 മണിക്ക് വസതിയിൽ ആരംഭിക്കുന്നതും തുടർന്ന് കടുത്തുരുത്തി സെൻ്റ് മേരീസ് ചർച്ചിൽ (താഴത്ത് പള്ളി) അന്ത്യകർമ്മങ്ങൾ നടത്തും.

കേരള കോൺഗ്രസ് (എം) പ്രതിനിധിയായി ഒമ്പതാം കേരള നിയമസഭയിൽ (1991-1996) അദ്ദേഹം കടുത്തുരുത്തിയിൽ നിന്ന് തിരഞ്ഞെടുക്കപ്പെട്ടു.  

പി.ജെ. മാത്യുവിന്റെ മകനായി 1950 സെപ്റ്റംബർ 30-നാണ് അദ്ദേഹം ജനിച്ചത്. നിയമബിരുദധാരിയായ  അദ്ദേഹം ഒരു അഭിഭാഷകൻ കൂടിയായിരുന്നു. കുസുമം മാത്യുവാണ് ഭാര്യ; മൂന്ന് മക്കളുണ്ട്. 

നിയമസഭയിലെ പെറ്റീഷൻ കമ്മിറ്റി ചെയർമാൻ, കേരള കോൺഗ്രസ് (എം) ജനറൽ സെക്രട്ടറി, കെഎസ്എഫ്ഇ വൈസ് ചെയർമാൻ, റബ്ബർ മാർക്ക് വൈസ് പ്രസിഡന്റ് എന്നീ പദവികൾ വഹിച്ചിട്ടുണ്ട്. കേരള സ്റ്റുഡന്റ്സ് കോൺഗ്രസ് , യൂത്ത് ഫ്രണ്ട് എന്നിവയുടെ സംസ്ഥാന പ്രസിഡന്റായും പ്രവർത്തിച്ചിട്ടുണ്ട്.