കോട്ടയം: കന്നുകാലി സെന്‍സസിന്റെ ജില്ലാതല വിവരശേഖരണത്തിനു ജില്ലയില്‍ തുടക്കം. ജില്ലയില്‍ ആകെയുള്ള കന്നുകാലികള്‍, പക്ഷികള്‍, വളര്‍ത്തുമൃഗങ്ങള്‍ എന്നിവയുടെ ഇനം, പ്രായം, ലിംഗം എന്നിവയുടെ അടിസ്ഥാനത്തിലുള്ള വിശദവിവരങ്ങളും മൃഗസംരക്ഷണ മേഖലയിലെ കര്‍ഷകര്‍, വനിത സംരംഭകര്‍, ഗാര്‍ഹിക-ഗാര്‍ഹികേതര സംരംഭങ്ങള്‍, സ്ഥാപനങ്ങള്‍ എന്നിവയുടെ വിശദവിവരങ്ങളും ശേഖരിക്കും.
തെരുവ് കന്നുകാലികള്‍, തെരുവുനായ്ക്കള്‍, നാട്ടാനകള്‍, അറവുശാലകള്‍, മാംസസംസ്‌ക്കരണ പ്ലാന്റുകള്‍, ഗോശാലകള്‍ എന്നിവയുടെ വിവരങ്ങളും ശേഖരിക്കും. കുടുംബശ്രീ മിഷനില്‍നിന്ന് മൃഗസംരക്ഷണ വകുപ്പ് മുഖേന നിയോഗിച്ച എ ഹെല്‍പ്, പശു സഖി പ്രവര്‍ത്തകരാണ് ജില്ലയിലെ 580000 വീടുകളും സ്ഥാപനങ്ങളും സന്ദര്‍ശിച്ച് വിവരശേഖരണം നടത്തുക.
നാലുമാസം കൊണ്ട് സെന്‍സസ് പൂര്‍ത്തീകരിക്കുകയാണു ലക്ഷ്യം.
കന്നുകാലി സമ്പത്ത് മെച്ചപ്പെടുത്താനുള്ള പരിപാടികളുടെ/പദ്ധതികളുടെ ആസൂത്രണം, രൂപീകരണം, നടപ്പാക്കല്‍, നിരീക്ഷണം എന്നിവ സുഗമമാക്കുകയാണ് സെന്‍സസിന്റെ ലക്ഷ്യം. നടപ്പാക്കിയ പദ്ധതികളുടെ സ്ഥിതി മനസിലാക്കാനും പോരായ്മകള്‍ പരിഹരിക്കാനും പ്രവണതകള്‍, രീതികള്‍, വെല്ലുവിളികള്‍ എന്നിവ തിരിച്ചറിയാനും സെന്‍സസ് സഹായകമാകും.
സെന്‍സസിനായി പ്രത്യേക മൊബൈല്‍ ആപ്ലിക്കേഷന്‍ തയാറാക്കിയിട്ടുണ്ട്. വീടുകള്‍ തോറും കയറിയിറങ്ങിയാണ് വിവരശേഖരണം നടത്തുക.
സൂപ്പര്‍ വൈസര്‍മാര്‍ പ്രാഥമിക വിലയിരുത്തലിനു ശേഷം ഇവ ജില്ലാതലത്തില്‍ സമര്‍പ്പിക്കും. തുടര്‍ന്ന് അത് സംസ്ഥാനതലത്തിലേക്കും ദേശീയ തലത്തിലേക്കും നല്‍കും. കുടുംബശ്രീ മുഖേന തെരഞ്ഞെടുത്തവരില്‍ പരിശീലനം വിജയകരമായി പൂര്‍ത്തീകരിച്ചവരാണ് പശു സഖിമാര്‍.
പശു സഖിമാര്‍ക്ക് മൃഗസംരക്ഷണ വകുപ്പ് പരിശീലനകേന്ദ്രം വഴി പ്രത്യേക പരിശീലനം നല്‍കി എ ഹെല്‍പ് പരിശീലകരാക്കി മാറ്റിയിട്ടുണ്ട്. വകുപ്പിന്റെയും കര്‍ഷകരുടെയും ഇടയിലുള്ള കണ്ണിയായാണ് എ ഹെല്‍പ് പ്രവര്‍ത്തകര്‍ ഇടപെടുക. 182 പശു സഖിമാരാണു ജില്ലയിലുള്ളത്.
/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/2024/10/28/Du4QujqX1bEl0MDzKHDI.jpg)