കോട്ടയം: റേഷന് കടകളില് ഇന്നു മുതല് അനിശ്ചിതകാല സമരത്തിലേക്ക് ഇറങ്ങുന്നതോടെ പൊതുവിപണിയില് അരിക്ക് ആവശ്യക്കാര് ഏറുന്നത് വില വര്ധിക്കാന് കാരണമാകുമോയെന്ന് ആശങ്ക.
നിലവില്, കുത്തരിയുടെ ചില്ലറ വില 56 രൂപ മുതല് മുകളിലേക്കാണ്. ജയ അരിയുടെ വില 40 രൂപയിലും. പായ്ക്കറ്റിലാകുമ്പോള് കുത്തരി വില 60 രൂപ വരെയാകും.
സമരം തുടങ്ങുന്നതോടെ റേഷന് കിട്ടാതായാല് ആളുകള്ക്കു പൊതു വിപണിയെ ആശ്രയിക്കേണ്ടി വരും. ഇതാണ് അരിവില വര്ധിക്കുമോ എന്ന ആശങ്കയ്ക്കു കാരണം.
നിലവിലെ സാഹചര്യത്തില് അരിവില വര്ധിക്കാനുള്ള സാധ്യത കുറവാണെന്നും ഒരു വിഭാഗം വ്യാപാരികള് പറയുന്നു.
സമരത്തെ തുടര്ന്ന് സംസ്ഥാനത്ത് ഇന്ന് മുതല് റേഷന് വിതരണം സ്തംഭനത്തിലേക്ക് നീങ്ങും. സമരം പിന്വലിച്ചില്ലെങ്കില് ലൈസന്സ് റദ്ദാക്കുന്നത് അടക്കമുള്ള നടപടികളിലേക്ക് കടക്കേണ്ടി വരുമെന്ന് ഭക്ഷ്യമന്ത്രി ഇന്നലെ മുന്നറിയിപ്പ് നല്കിയിരുന്നു.
എന്നാല് സര്ക്കാരിന്റെ ഭീഷണി മറികടന്നാണ് വ്യാപാരികള് സമരത്തിന് ഒരുങ്ങുന്നത്. ശമ്പളപരിഷ്കരണം അടക്കമുള്ള ആവശ്യങ്ങള് ഉന്നയിച്ചാണ് വ്യാപാരികളുടെ അനിശ്ചിതകാല കടയടപ്പ് സമരം.
രണ്ട് തവണ വ്യാപാരികളുമായി സര്ക്കാര് ചര്ച്ച നടത്തിയെങ്കിലും വിജയിച്ചിരുന്നില്ല. മറ്റെല്ലാ ആവശ്യങ്ങളും അംഗീകരിക്കാം പക്ഷെ ശമ്പളം വര്ധിപ്പിക്കാനാവില്ലെന്നാണ് ചര്ച്ചകളില് സര്ക്കാര് സ്വീകരിച്ച നിലപാട്.
ശമ്പളം വര്ധിപ്പിക്കലാണ് പ്രധാന ആവശ്യമെന്ന് വ്യക്തമാക്കിയ റേഷന് വ്യാപാരികള് സര്ക്കാര് കടുത്ത പ്രതിസന്ധിയിലാണെന്ന ധനമന്ത്രിയുടെ നീതികരണം തള്ളിക്കളഞ്ഞു. ശമ്പള പരിഷ്കരണം നടപ്പാക്കാനാകില്ലെന്ന് തീര്ത്തുപറഞ്ഞ സര്ക്കാരിനെ ശക്തമായ സമരത്തിലൂടെ സമ്മര്ദ്ദത്തിലാക്കാനാണ് റേഷന് വ്യാപാരികളുടെ നീക്കം.