/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/2025/11/30/untitled-2025-11-30-13-35-59.jpg)
കോട്ടയം: തീര്‍ഥാടന കാലത്ത് സ്ഥിരം അപകടം.. എങ്കിലും സുരക്ഷയ്ക്കായി കണ്ണിമല വളവില്‍ ഉള്ളത് കൂട്ടിയിട്ട കരിങ്കല്‍ കൂനയും പഴയ ടയറുകളും. കഴിഞ്ഞ ദിവസവും ഇവിടെ തീര്‍ഥാടക വാഹനം മറിഞ്ഞ് അപകടത്തില്‍പ്പെട്ടിരുന്നു.
പതിവായി അപകടം നടക്കുന്ന സ്ഥലത്ത് മൂന്ന് വര്‍ഷങ്ങള്‍ക്ക് മുന്‍പ് ഇതേ സ്ഥലത്ത് താല്‍ക്കാലികമായി കരിങ്കല്ലുകള്‍ നിരത്തി ടയറുകള്‍ സ്ഥാപിച്ച് സുരക്ഷയൊരുക്കിയത് അന്ന് കോട്ടയം ജില്ല പോലീസ് മേധാവിയായിരുന്ന കാര്‍ത്തികിന്റെ നേതൃത്വത്തിലായിരുന്നു.
2022 ഡിസംബര്‍ 16 നുണ്ടായ അപകടത്തില്‍ തമിഴ്നാട് നിന്നുള്ള തീര്‍ഥാടക സംഘത്തിലെ 11 വയസുള്ള ബാലികയാണ് മരിച്ചത്. അന്ന് ക്രാഷ് ബാരിയര്‍ പൂര്‍ണമായി തകര്‍ത്ത് വാഹനം താഴ്ച്ചയിലേക്കു പതിക്കുകയായിരുന്നു.
തകര്‍ന്ന ക്രാഷ് ബാരിയറിന് പകരം സുരക്ഷ സംവിധാനമായി അന്ന് ജില്ല പോലീസ് മേധാവിയായിരുന്ന കെ. കാര്‍ത്തികിന്റെ നേതൃത്വത്തിലാണു കരിങ്കല്‍ ഇറക്കി ടയറുകള്‍ സ്ഥാപിച്ചത്.
പൊതുമരാമത്ത് വിഭാഗം ക്രാഷ് ബാരിയറുകള്‍ സ്ഥാപിക്കാന്‍ കാലതാമസം വരുത്തിയതോടെയാണ് പോലീസ് ഇടപ്പെട്ട് താല്‍ക്കാലിക സുരക്ഷാ മതില്‍ തീര്‍ത്തത്. അതിന് ശേഷം നടന്ന അപകടത്തില്‍ ഈ കരിങ്കല്ലുകൊണ്ടുള്ള തടയാണ് വാഹനങ്ങള്‍ക്ക് രക്ഷയായത്.
കഴിഞ്ഞ ദിവസം തീർഥാടക ബസ് അപകടത്തില്‍പ്പെട്ടപ്പോള്‍ ബസില്‍ ഉണ്ടായിരുന്നത് മുന്‍ എസ്പിയുടെ ബന്ധുക്കളായിരുന്നു.
മൂന്നു വര്‍ഷം മുന്‍പ് അന്ന് അദ്ദേഹം സുരക്ഷയ്ക്കായി എടുത്ത കരുതല്‍ തീര്‍ഥാടക സംഘത്തിനു രക്ഷയായി. അപകട സ്ഥലത്തിന് തൊട്ടു മുകളിലായി സീസണില്‍ പോലീസിന്റെ എയ്ഡ് പോസ്റ്റും സ്ഥാപിച്ചിട്ടുണ്ട്.
ഇവിടെ നിന്നും പോലീസും എത്തി. കുത്തിറക്കവും കൊടുംവളവും ഉള്ളതിനാല്‍ വാഹനങ്ങള്‍ അപകടത്തില്‍പ്പെടാനുള്ള സാധ്യതയേറെയാണ്. ഇറക്കം ഇറങ്ങി വരുന്ന വാഹനങ്ങളുടെ ബ്രേക്ക് നഷ്ടമാകുന്നതാണ് അപകടത്തില്‍ പ്രധാന കാരണം.
അപകടത്തില്‍ തകര്‍ന്ന ക്രാഷ് ബാരിയര്‍ സ്ഥാപിക്കാന്‍ എസ്റ്റിമേറ്റ് തയ്യാറാക്കിയിട്ടുണ്ടെന്നാണ് അധികൃതര്‍ പറയുന്നത്.
എന്നാല്‍, ക്രാഷ് ബാരിയറുകള്‍ വേണ്ടത്ര ബലത്തിലല്ല സ്ഥാപിക്കുന്നത്. വാഹനങ്ങള്‍ അപകടത്തില്‍പ്പെടാതിരിക്കാന്‍ കാര്യക്ഷമമായ മാര്‍ഗം സ്വീകരിക്കണമെന്നാണ് നാട്ടുകാര്‍ ആവശ്യപ്പെടുന്നത്.