നാദാപുരത്ത് ചികിത്സക്കെത്തിയ 16 കാരിയെ പീഡിപ്പിച്ച ആയുർവേദ ഡോക്ടർ അറസ്റ്റിൽ

കോഴിക്കോട്: നാദാപുരത്ത് ആശുപത്രിയിൽ ചികിത്സക്കായെത്തിയ പതിനാറുകാരിയായ വിദ്യാർത്ഥിനിയെ പീഡിപ്പിച്ച സംഭവത്തിൽ ആയുർവേദ ഡോക്ടർ അറസ്റ്റിൽ.

 മാഹി സ്വദേശി കല്ലാട്ട് ശ്രാവൺ(25) ആണ് പിടിയിലായത്. അറസ്റ്റിന് പിന്നാലെ ഇയാളെ ആശുപത്രിയിൽ നിന്ന് സസ്‌പെന്റ് ചെയ്തതായി അധികൃതർ വ്യക്തമാക്കി. 

ശ്രാവൺ വൈദ്യപഠനം പൂർത്തിയാക്കിയിരുന്നില്ലെന്നും, ആശുപത്രിയിൽ തെറാപ്പിസ്റ്റായാണ് ജോലി ചെയ്തിരുന്നതെന്നും വ്യക്തമാക്കിയ അധികൃതർ ഇയാൾ സ്ഥിരം ജീവനക്കാരൻ ആയിരുന്നില്ലെന്നും സൂചിപ്പിച്ചു.

കഴിഞ്ഞ ജൂലൈയിൽ അമ്മയോടൊപ്പം ചികിത്സക്കായെത്തിയ വിദ്യാർത്ഥിനിയെയാണ് ഇയാൾ ലൈംഗികമായി പീഡിപ്പിച്ചത്. നാദാപുരം-തലശ്ശേരി റോഡിൽ പ്രവർത്തിക്കുന്ന ആശുപത്രിയിൽ വച്ചാണ് സംഭവമുണ്ടായത്. 

കഴിഞ്ഞ ദിവസമാണ് പെൺകുട്ടി ഇതുസംബന്ധിച്ച് നാദാപുരം പൊലീസിൽ മൊഴി നൽകിയത്. നാദാപുരം ഇൻസ്‌പെക്ടറുടെ നേതൃത്വത്തിലാണ് പ്രതിയെ അറസ്റ്റ് ചെയ്തത്. 

ഇയാൾക്കെതിരേ പോക്‌സോ വകുപ്പ് ചുമത്തിയിട്ടുണ്ട്. സംഭവത്തിൽ അന്വേഷണം നടത്തി വരികയാണെന്ന് പൊലീസ് അറിയിച്ചു.