കെ.പി.സി.സി ഡിജിറ്റൽ മീഡിയ സെല്ലിന്റെ പേരും ചുമതലക്കാരനെയും മാറ്റി. ഇനി ഡി.എം.സി ഇല്ല. വരുന്നത് സോഷ്യൽ മീഡിയ സെൽ. സെല്ലിന്റെ ചുമതല ഹൈബിക്ക്. സെല്ലിൽ പ്രവർത്തിക്കുന്നവരും നിരീക്ഷണത്തിൽ.കോൺഗ്രസ് വിട്ടവർക്കും മാദ്ധ്യമങ്ങൾക്കും സെല്ലിൽ പ്രവർത്തിക്കുന്ന ചിലർ വാർത്തയും രഹസ്യങ്ങളും ചോർത്തി നൽകുന്നതായി പരാതി. വരാനിരിക്കുന്നത് സമ്പൂർണ്ണ അഴിച്ചുപണി

കൊച്ചി: കെ.പി.സി.സി ജിജിറ്റൽ മീഡിയ സെല്ലിനെപ്പറ്റിയുള്ള വലിയ വിവാദങ്ങൾക്കിടെ സെൽ അഴിച്ചു പണിത് പാർട്ടി നേതൃത്വം.

എ.ഐ.സി.സിയുടെ നിർദ്ദേശം മുൻനിർത്തിയാണ് സെൽ അഴിച്ചുപണിതത്. നിലവിൽ സെല്ലിന്റെ ചുമതലയുണ്ടായിരുന്ന വി.ഡി ബൽറാം ഒഴിയാൻ സന്നദ്ധത പ്രകടിപ്പിച്ച സാഹചര്യത്തിൽ ചുമതല കെ.പി.സി.സി ഉപാദ്ധ്യക്ഷൻ കൂടിയായ ഹൈബി ഈഡന് കൈമാറി.

സെല്ലിന്റെ പേരിലും മാറ്റം വരുത്തി. ഇതുവരെ ഡിജിറ്റൽ മീഡിയ സെൽ എന്ന് അറിയപ്പെട്ടിരുന്ന സെൽ ഇനി സോഷ്യൽ മീഡിയ സെല്ലായി മാറും. 

മുമ്പ് പി.സരിന് ചുമതലയുണ്ടായിരുന്നപ്പോൾ അയാൾ ഇട്ടിരുന്ന പേരാണ് എ.ഐ.സി.സി നിർദ്ദേശത്തോടെ മാറ്റിയത്. ദേശീയ തലത്തിലും മറ്റു സംസ്ഥാന ഘടകങ്ങളിലും സോഷ്യൽ മീഡിയ സെൽ എന്നാണ് അറിയപ്പെടുന്നത്.

ഡിജിറ്റൽ മീഡിയ സെല്ലിന്റെ പ്രവർത്തനത്തിൽ പ്രതിപക്ഷ നേതാവ് വി.ഡി. സതീശൻ ഉൾപ്പെടെയുള്ളവർക്ക് അതൃപ്തിയുണ്ടായിരുന്നു.

രാഹുൽ മാങ്കൂട്ടത്തിൽ വിഷയത്തിൽ സതീശന് എതിരെ സൈബർ ആക്രമണം അതിരുവിട്ടതോടെയാണു ദേശീയ നേതൃത്വം സെല്ലിന്റെ കാര്യത്തിൽ പുനർവിചിന്തനം വേണമെന്ന തരത്തിൽ ഇടപെടൽ നടത്തിയത്.

ബീഡി- ബിഹാർ പോസ്റ്റിനു പിന്നാലെ വി.ടി. ബൽറാം സെല്ലിന്റെ ചെയർമാൻ സ്ഥാനം ഒഴിഞ്ഞെങ്കിലും കെപിസിസി രാജി സ്വീകരിച്ചിരുന്നില്ല. 

തുടർന്ന് നടന്ന ചർച്ചകളിലേക്കാണ് സ്ഥാനത്തേക്ക് ഏകകണ്ഠമായി ഹൈബിയുടെ പേര് നിർദ്ദേശിച്ചത്.

തുടർന്ന് കഴിഞ്ഞ കെ.പി.സി.സി യോഗത്തിൽ പങ്കെടുക്കാൻ എത്തിയ ഹൈബി ഈഡനോട് പുതിയ ചുമതല സംബന്ധിച്ച കാര്യം ദീപാദാസ് മുൻഷി സൂചിപ്പിക്കുകയും ചെയ്തു.

ഹൈബി സമ്മതം അറിയിച്ചതോടെയാണ് തലപ്പത്ത് അഴിച്ചു പണിക്ക് വഴിതുറന്നത്. പ്രഫഷനൽ സംഘത്തെ നിയോഗിച്ച് സോഷ്യൽ മീഡിയ ടീമിനെ ശാക്തീകരിച്ച് മുഖം മിനുക്കാനാണ് നിലവിലെ തീരുമാനം. 

നിയമസഭാ തിരഞ്ഞെടുപ്പ് നടക്കാനിരിക്കുന്ന പശ്ചാത്തലത്തിൽ ദേശീയ നേതൃത്വത്തിന്റെ നേരിട്ടുള്ള നിരീക്ഷണത്തിൽ ആയിരിക്കും പുതിയ ടീമിന്റെ പ്രവർത്തനം.

നിലവിലുള്ള ടീം കാര്യക്ഷമമല്ലെന്നു ദീപാദാസ് മുൻഷി ദേശീയ നേതൃത്വത്തെ അറിയിച്ചിരുന്നു. പരാതി നേതൃത്വത്തിനു ബോധ്യപ്പെട്ടതിനു പിന്നാലെ സമൂഹമാധ്യമ വിഭാഗം ശക്തിപ്പെടുത്താൻ സമിതിയെ കെപിസിസി നിയോഗിച്ചിരുന്നു.

സമൂഹമാധ്യമ പ്രവർത്തനങ്ങളുടെ മേൽനോട്ടത്തിനു മുതിർന്ന നേതാക്കളുടെ മോണിറ്ററിങ് ടീം ഉണ്ടായിരിക്കുമെന്നാണ് വിവരം. കർശനമായ മാർഗനിർദ്ദേശങ്ങളും നിയന്ത്രണ സംവിധാനങ്ങളും കൊണ്ടുവരും.

നിലവിൽ സെല്ലിൽ ഉൾപ്പെടുന്ന ചിലർ കോൺരഗസ് വിട്ട് സി.പി.എമ്മിലെത്തിയ പി.സരിൻ അടക്കമുള്ളവർക്ക് പല വാട്‌സാപ്പ് ഗ്രൂപ്പുകളുടെയും സ്‌ക്രീൻ ഷോട്ട് അയച്ചു നൽകുന്നത് രശദ്ധയിൽപെട്ടിട്ടുണ്ട്. 

ഇതിന് പുറമേ ചില മാദ്ധ്യമങ്ങൾക്കും സെല്ലിലെ ചിലർ വാർത്ത ചോർത്തി നൽകുന്നുണ്ട്. കെ.പി.സി.സിയിലെ പ്രവർത്തനങ്ങളും ചില യോഗങ്ങളിൽ തീരുമാനം എടുക്കും മുമ്പ് നടക്കുന്ന ചർച്ചകളും ഇത്തരത്തിൽ ചോരുന്നുണ്ടെന്നാണ് ലഭിക്കുന്ന വിവരം.

കെ.പി.സി.സി അദ്ധ്യക്ഷന്റെ ഓഫീസിനോട് അടുത്ത് നിൽക്കുന്ന മീഡിയ സെല്ലിലെ ചിലർക്കെതിരെയും ഇത്തരത്തിൽ ആരോപണം ഉയരുന്നുണ്ട്. 

മുമ്പ് സുധാകരൻ - സതീശൻ പോരിന് വഴിവെയ്ക്കുന്ന തരത്തിൽ വാർത്ത നൽകാൻ മാധ്യമങ്ങളെ സഹായിച്ചതും ഇവരിൽ ചിലരാണെന്നും ഹൈബിക്ക് വിവരം ലഭിച്ചിട്ടുണ്ട്.

അതുകൊണ്ട് തന്നെ സെല്ലിൽ വരാനിരിക്കുന്നത് സമ്പൂർണ്ണ അഴിച്ചുപണിയായിരിക്കുമെന്നും സൂചനകളുണ്ട്.