തിരുവനന്തപുരം: വ്യവസായ സംരംഭകര്‍ക്ക് ഫയര്‍ ആന്‍ഡ് റെസ്ക്യൂ എന്‍.ഒ.സി ഉള്‍പ്പെടെ സംരംഭങ്ങള്‍ ആരംഭിക്കുന്നതിനും പ്രവര്‍ത്തിപ്പിക്കുന്നതിനും ആവശ്യമായ ക്ലിയറന്‍സുകള്‍ എളുപ്പത്തിലാക്കി കേരള സംസ്ഥാന വ്യവസായ വികസന കോര്‍പ്പറേഷന്‍ (കെഎസ്ഐഡിസി). ഈസ് ഓഫ് ഡൂയിംഗ് ബിസിനസിന്‍റെ ഭാഗമായി ഒന്നിലധികം ഓഫീസുകള്‍ സന്ദര്‍ശിക്കുന്നതിന് പകരം കെ-സ്വിഫ്റ്റ് പോര്‍ട്ടലിലൂടെ (https://kswift.kerala.gov.in/index/) ഫയര്‍ ആന്‍ഡ് റെസ്ക്യൂ വകുപ്പിന്‍റെ നിരാക്ഷേപ പത്രത്തിനായുള്ള അപേക്ഷ സമര്‍പ്പിക്കാനാകും.
സര്‍ട്ടിഫിക്കേഷന്‍ പ്രക്രിയ എളുപ്പത്തിലും വേഗത്തിലും സുതാര്യവും ആക്കുന്നതിനായിട്ടാണ് സര്‍ക്കാര്‍ കെ-സ്വിഫ്റ്റ് (കേരള സിംഗിള്‍ വിന്‍ഡോ ഇന്‍റര്‍ഫേസ് ഫോര്‍ ഫാസ്റ്റ് ആന്‍ഡ് ട്രാന്‍സ്പരന്‍റ് ക്ലിയറന്‍സ്) സംവിധാനം ആരംഭിച്ചിട്ടുള്ളത്. ഇതുവഴി സര്‍ട്ടിഫിക്കറ്റിനായി ഓണ്‍ലൈനില്‍ അപേക്ഷിക്കാം. സംരംഭങ്ങള്‍ തുടങ്ങാനുള്ള കാലതാമസം ഒഴിവാക്കാനുമാകും.
കേരള ഫയര്‍ ആന്‍ഡ് റെസ്ക്യൂ സര്‍വീസസ് വകുപ്പാണ് ഫയര്‍ ആന്‍ഡ് റെസ്ക്യൂ നിരാക്ഷേപ പത്രം നല്‍കുന്നത്. ഒരു കെട്ടിടമോ വ്യാവസായിക യൂണിറ്റോ അഗ്നിസുരക്ഷാ മാനദണ്ഡങ്ങള്‍ പാലിക്കുന്നുണ്ടെന്നും മതിയായ പ്രതിരോധ നടപടികള്‍ നിലവിലുണ്ടെന്നും ഇത് ഉറപ്പാക്കുന്നു. തീപിടുത്ത സാധ്യതയുള്ള വസ്തുക്കളുടെ നിര്‍മ്മാണം, സംഭരണം, കൈകാര്യം ചെയ്യല്‍ എന്നിവ ഉള്‍പ്പെട്ടിട്ടുള്ള വ്യവസായങ്ങള്‍ക്ക് ഈ സര്‍ട്ടിഫിക്കറ്റ് നിര്‍ബന്ധമാണ്.
നിലവില്‍ കെ-സ്വിഫ്റ്റ് 22 വകുപ്പുകളുടെയും ഏജന്‍സികളുടെയും സേവനങ്ങള്‍ വാഗ്ദാനം ചെയ്യുന്നു. എല്ലാ അപേക്ഷകളും ഏകീകൃത പൊതു അപേക്ഷാ ഫോം (കോമണ്‍ ആപ്ലിക്കേഷന്‍ ഫോം) വഴി സമര്‍പ്പിക്കാം.
സംരംഭകരെ പിന്തുണയ്ക്കുന്നതിലും സംസ്ഥാനത്തുടനീളമുള്ള വ്യവസായ പദ്ധതികള്‍ പ്രോത്സാഹിപ്പിക്കുന്നതിലും നിര്‍ണായക പങ്ക് വഹിക്കുന്ന കെഎസ്ഐഡിസി സാമ്പത്തിക പിന്തുണ, ഉപദേശക സേവനങ്ങള്‍, അനുമതി നേടുന്നതിനുള്ള സഹായം എന്നിവ നല്‍കുന്നതിലൂടെ എംഎസ്എംഇകളുടെ പ്രവര്‍ത്തനത്തെ ഗുണപരമായി സഹായിക്കുന്നു.
എംഎസ്എംഇ മേഖലയ്ക്ക് അനുകൂലമായ ആവാസവ്യവസ്ഥ കെട്ടിപ്പടുക്കുന്നതിനായി 2022-23 ല്‍ സംസ്ഥാന സര്‍ക്കാര്‍ ആരംഭിച്ച 'സംരംഭക വര്‍ഷം' പദ്ധതി സംസ്ഥാനത്തെ വ്യവസായ അന്തരീക്ഷത്തിന് ഏറെ കരുത്ത് പകര്‍ന്നു. ഒരു വര്‍ഷം ഒരു ലക്ഷം സംരംഭം എന്ന ലക്ഷ്യത്തിലുള്ള പദ്ധതി ഓരോ വര്‍ഷവും ഈ നേട്ടം പിന്നിട്ടു. സംസ്ഥാനത്തിന്‍റെ സംരംഭക സാധ്യതകള്‍ തുറന്നുകാട്ടിയ പദ്ധതിയിലൂടെ 3,50,000-ത്തിലധികം എംഎസ്എംഇ യൂണിറ്റുകളാണ് ഇതുവരെ രൂപീകരിച്ചത്.
എംഎസ്എംഇ യൂണിറ്റുകള്‍ ആരംഭിക്കുന്നതിനുള്ള നടപടിക്രമങ്ങള്‍ കെ-സ്വിഫ്റ്റും അതുപോലുള്ള മറ്റ് പദ്ധതികളും വഴി സര്‍ക്കാര്‍ ലളിതമാക്കുകയും സുതാര്യമാക്കുകയും ചെയ്തിട്ടുണ്ട്. ഇത് കൂടുതല്‍ എംഎസ്എംഇ സംരംഭങ്ങള്‍ക്ക് കടന്നുവരാനുള്ള സാഹചര്യമൊരുക്കുന്നു.
Follow Us/sathyam/media/media_files/0wxDZjWK3NT5NTkXlK4m.jpg)
/sathyam/media/agency_attachments/5VspLzgrB7PML1PH6Ix6.png)
