തദ്ദേശ തെരഞ്ഞെടുപ്പ്: 'മഞ്ഞുമ്മൽ ബോയ്സി'ലെ സുഭാഷ് കളത്തിൽ! സിനിമാപ്രേമികൾക്ക് കൗതുകം

കൊച്ചി: കേരളത്തിൽ തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പ് ചൂടുപിടിക്കുമ്പോൾ, മത്സരാർത്ഥികളുടെ പട്ടികയിൽ ശ്രദ്ധേയമായ ഒരു പേര് കൂടി ഇടം നേടിയിരിക്കുന്നു. ബ്ലോക്ക്ബസ്റ്റർ ചിത്രം 'മഞ്ഞുമ്മൽ ബോയ്സി'ലെ യഥാർത്ഥ നായകനായ സുഭാഷ് തദ്ദേശ തെരഞ്ഞെടുപ്പിൽ മത്സരിക്കുന്നു എന്ന വാർത്തയാണ് ഇപ്പോൾ സോഷ്യൽ മീഡിയയിൽ വൈറലായിരിക്കുന്നത്.

യഥാർത്ഥ ഹീറോ ഇനി ജനപ്രതിനിധി? കൊടൈക്കനാലിലെ ഗുണാ കേവിലുണ്ടായ അപകടത്തെ അതിജീവിച്ച്, സിനിമയിലൂടെ രാജ്യമെമ്പാടും ചർച്ചയായ സുഭാഷ്, രാഷ്ട്രീയത്തിലേക്ക് കടന്നുവരുന്നതിൽ സിനിമാപ്രേമികൾക്കിടയിലും നാട്ടുകാർക്കിടയിലും വലിയ കൗതുകമുണർത്തിയിട്ടുണ്ട്.

ഏലൂർനഗരസഭയിലെ 27 ആം വാർഡിലാണ് സുഭാഷ് മത്സരിക്കുന്നത്  നാടിന്റെ 'റിയൽ ലൈഫ് ഹീറോ' ജനസേവന രംഗത്തേക്ക് വരുന്നത് വലിയ പ്രതീക്ഷയോടെയാണ് ആരാധകർ കാണുന്നത്.

"മരണമുഖത്ത് നിന്ന് തിരിച്ചെത്തിയയാൾ, തീർച്ചയായും ജനങ്ങളുടെ പ്രശ്നങ്ങളെ ധൈര്യത്തോടെ നേരിടും," എന്നാണ് സോഷ്യൽ മീഡിയയിൽ പലരും പ്രതികരിക്കുന്നത്. സുഹൃത്തുക്കൾ നൽകിയ പിന്തുണയുടെയും സൗഹൃദത്തിന്റെയും കഥ പറഞ്ഞ സുഭാഷ്, ഇനി സ്വന്തം നാടിന്റെ വികസന സ്വപ്നങ്ങൾക്ക് വേണ്ടി നിലകൊള്ളുമോ എന്നാണ് ഏവരും ഉറ്റുനോക്കുന്നത്.