തിരുവനന്തപുരം: കേരളത്തിലെ ഭാവി തലമുറ ഇവിടെ നില്ക്കാനാഗ്രഹിക്കുന്നില്ലെന്ന് മാത്യു കുഴല്നാടന്.
ഇവിടുന്ന് എങ്ങനെയെങ്കിലും രക്ഷപ്പെട്ടാല് മതിയെന്ന ചിന്തയാണ് അവര്ക്കുള്ളതെന്നും കുഴല്നാടന് നിയമസഭയില് പറഞ്ഞു. കേരളത്തിലെ വിദ്യാര്ഥികളുടെ വിദേശകുടിയേറ്റം സംബന്ധിച്ച അടിയന്തര പ്രമേയത്തിന് നിയമസഭയില് നോട്ടീസ് നല്കി സംസാരിക്കുകയായിരുന്നു മാത്യു കുഴല്നാടന്.
എന്നാല് കാര്യങ്ങള് അങ്ങനയല്ലെന്ന് ഉന്നതവിദ്യാഭ്യാസ വകുപ്പ് മന്ത്രി ആര്.ബിന്ദു വ്യക്തമാക്കി. കേരളം മഹാമോശമാണ് എന്ന പ്രചാരണം എംഎല്എ നടത്താന് പാടില്ലായിരുന്നുവെന്നും മന്ത്രി പറഞ്ഞു.
വിദേശത്തേക്ക് എത്തിപ്പെടുന്ന എല്ലാവര്ക്കും മികച്ച ജോലി കിട്ടുന്നില്ലെന്നും ഈ യാഥാര്ഥ്യം വിദ്യാര്ഥികളെ പറഞ്ഞ് മനസ്സിലാക്കാനാണ് ശ്രമിക്കേണ്ടതെന്നും മന്ത്രി പറഞ്ഞു. കേരളമെന്ന് കേട്ടാല് തിളക്കണം ചോര ഞരമ്പുകളിലെന്ന് പാടിയിട്ടുള്ള പൂര്വ്വികരാണ് നമുക്കുള്ളതെന്നും മന്ത്രി ഓര്മ്മപ്പെടുത്തി.
പത്താംക്ലാസ് കഴിഞ്ഞിറങ്ങുന്നവര്ക്ക് നേരെ ചൊവ്വെ എഴുത്തും വായനയും അറിയില്ലെന്ന് മന്ത്രി സജി ചെറിയാന് പറഞ്ഞത് യാഥാര്ഥ്യമാണെന്ന് മാത്യു കുഴല്നാടന് പ്രസംഗത്തിനിടെ പറഞ്ഞു.
കേരളത്തിലെ ഭാവിതലമുറ ഇവിടെ നില്ക്കാനാഗ്രഹിക്കുന്നില്ല. ഇവിടെ നിന്ന് എങ്ങനെയെങ്കിലും കടന്നു പോയാല് രക്ഷപ്പെടുമെന്ന് ചിന്തിക്കുന്നവരാണ് 18 വയസ്സു മുതലുള്ള ഇപ്പോഴത്തെ തലമുറ. ഇത് ഭയനാകരമായ അവസ്ഥയാണ്. അത് ചര്ച്ചചെയ്യാതിരുന്നിട്ടോ അംഗീകരിക്കാതിരുന്നിട്ടോ കാര്യമില്ല.
ഇന്നത്തെ തലമുറ ജീവിക്കാനാഗ്രഹിക്കുന്ന ഒരു അന്തരീക്ഷം നല്കാന് നമുക്ക് കഴിഞ്ഞിട്ടില്ല. 6000 രൂപ മുതല് 10,000 രൂപവരെ ശമ്പളത്തിലാണ് കേരളത്തിലെ ചെറുപ്പക്കാര് ജോലിചെയ്യുന്നത്.
ശരാശരി ഒരു വര്ഷം ഓരോ നഗരത്തിലും ചെറുപ്പക്കാര്ക്ക് കിട്ടുന്ന ശമ്പള സ്കെയില് പരിശോധിക്കുമ്പോള് ബെംഗളൂരുവില് 9.57 ലക്ഷം രൂപ, ഹൈദരാബാദില് 7.23 ലക്ഷം രൂപ, പുണെയില് 7.19 ലക്ഷം രൂപ, മുംബൈയില് 6.4 ലക്ഷം രൂപ, ചെന്നൈയില് 6.18 ലക്ഷം രൂപ, ഡല്ഹിയില് 6.11 ലക്ഷം രൂപ, തിരുവനന്തപുരത്ത് 5.72 ലക്ഷം രൂപ, കൊച്ചിയില് 5.05 ലക്ഷം രൂപ എന്നിങ്ങനെയാണെന്നും കുഴല്നാടന് പറഞ്ഞു.
കേരളത്തില് മാത്രം എല്ലായിടത്തേക്കാളും കുറവ് വരാന് കാരണം ഇവിടുത്തെ സാമ്പത്തിക വളര്ച്ച വളരെ മന്ദഗതിയിലായതാണെന്നും അദ്ദേഹം പറഞ്ഞു.