പെയ്തിറങ്ങിയത് ഉൽക്കയോ ബഹിരാകാശ അവശിഷ്ടങ്ങളോ ? ഡൽഹിയിൽ കണ്ട തീജ്വാലകളിൽ ആശങ്ക

ഡൽഹി: വെള്ളിയാഴ്ച അർദ്ധരാത്രിക്ക് ശേഷം ഡൽഹി-എൻസിആർ മേഖലയിലെ ആകാശത്ത് അസാധാരണമായ ഒരു പ്രകാശ വിസ്മയം അരങ്ങേറി. നഗരത്തിലെ താമസക്കാരും ജോലി കഴിഞ്ഞ് മടങ്ങുന്നവരും ഉൾപ്പെടെ നിരവധി പേർ ആണ് അതിന് സാക്ഷിയായത്. 

ആകാശത്ത് തെളിഞ്ഞ പ്രകാശപാത ആളുകളിൽ ഒരേസമയം കൗതുകവും ആശയക്കുഴപ്പവും സൃഷ്ടിച്ചു. കണ്ടത് ഉൽക്കാവർഷമാണോ അതോ ബഹിരാകാശ മാലിന്യമാണോ എന്ന ചർച്ചകൾ സമൂഹമാധ്യമങ്ങളിൽ നിമിഷനേരം കൊണ്ടാണ് സജീവമായത്.

ശനിയാഴ്ച പുലർച്ചെ 1:20-നും 1:25-നും ഇടയിലായിരുന്നു സംഭവം. ഡൽഹി, നോയിഡ, ഗാസിയാബാദ്, ഗുഡ്ഗാവ് എന്നിവിടങ്ങളിലും അലിഗഢ് വരെയും ഇത് ദൃശ്യമായിരുന്നു. 

ദൃക്‌സാക്ഷികളുടെ വിവരണം അനുസരിച്ച്, നഗരത്തിലെ വിളക്കുകളെ പോലും നിഷ്പ്രഭമാക്കുന്ന അത്രയും ശക്തമായ പ്രകാശമായിരുന്നു അതിന്. ജീവിതത്തിൽ ഒരിക്കൽ മാത്രം കാണാൻ സാധിക്കുന്ന അനുഭവമെന്നാണ് പലരും ഇതിനെ വിശേഷിപ്പിച്ചത്.

ആകാശത്ത് ഒരു തിളങ്ങുന്ന പാത അവശേഷിപ്പിച്ചുകൊണ്ട് നീങ്ങിയ പ്രകാശം, കുറച്ചുകഴിഞ്ഞപ്പോൾ ചെറിയ കഷണങ്ങളായി പൊട്ടിത്തെറിക്കുകയും, ഓരോ കഷണവും പ്രകാശിച്ചുകൊണ്ട് താഴേക്ക് പതിക്കുകയും ചെയ്തു. 

ഇത് ആകാശത്ത് ചെറിയ വിളക്കുകൾ ചിതറിത്തെറിക്കുന്നത് പോലെ മനോഹരമായ ഒരു കാഴ്ചയായിരുന്നു. ഈ ദൃശ്യങ്ങളുടെ വീഡിയോകൾ സമൂഹമാധ്യമങ്ങളിൽ അതിവേഗം വൈറലായി. ചിലർ ഇതിനെ “ഷൂട്ടിംഗ് സ്റ്റാർ സ്ഫോടനം” എന്ന് വിശേഷിപ്പിച്ചു.

പലരും ഇതിനെ ഉൽക്കാവർഷം എന്ന് കരുതിയെങ്കിലും, വിദഗ്ധരുടെ അഭിപ്രായങ്ങൾ വ്യത്യസ്തമാണ്. ഇതൊരു ‘ബോളിഡ്’ (Bolide) ആയിരിക്കാമെന്ന് ചില വിദഗ്ധർ അഭിപ്രായപ്പെടുന്നു.