/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/2025/04/08/5a491WEKv0rdOEfyyGhI.jpg)
കൊച്ചി: നടിയെ ആക്രമിച്ച കേസില് പ്രതികള് കുറ്റകൃത്യത്തില് ഏര്പ്പെട്ടെന്ന് സംശയാതീതമായി തെളിയിക്കപ്പെട്ടെന്ന് വ്യക്തമാക്കുന്നതാണ് എറണാകുളം പ്രിന്സിപ്പല്സ് സെഷന്സ് കോടതിയുടെ വിധിയെന്ന് നിയമ മന്ത്രി പി രാജീവ്.
കേസിലെ എല്ലാ പ്രതികള്ക്കും 20 വര്ഷം ശിക്ഷ കിട്ടിയ കേസില് പ്രോസിക്യൂഷൻ പരാജയമാണെന്ന് പറയുന്നതില് അര്ത്ഥമില്ല. കുറ്റകൃത്യത്തില് ഏര്പ്പെട്ടവര്ക്ക് ശിക്ഷ ലഭിച്ചു എന്നും മന്ത്രി മാധ്യമങ്ങളോട് പ്രതികരിച്ചു.
കുറ്റം സംശയാതീതമായി തെളിയിക്കപ്പെട്ടു. ഗൂഢാലോചന തെളിയിക്കാന് കഴിഞ്ഞില്ലെന്നാണ് കോടതി പറഞ്ഞത്. ആ നിലപാടിലേക്ക് കോടതി എത്തിയത് എന്തുകൊണ്ടാണെന്നത് വിധി പകര്പ്പ് ലഭിച്ച ശേഷം മാത്രം വ്യക്തമാവുകയുള്ളു.
വിധി ന്യായത്തെ വിമര്ശിക്കാം. വിധി പറയുന്ന ന്യായാധിപരെ വിമര്ശിക്കുന്നത് ശരിയല്ല. എന്തുകൊണ്ട് ഈ വിധിയിലേക്ക് എത്തി എന്നത് വിധി പകര്പ്പ് ലഭിച്ച ശേഷം മാത്രമേ വ്യക്തമാവുകയുള്ളു. അതിന് ശേഷം തുടര് നടപടികള് സ്വീകരിക്കുമെന്നും മന്ത്രി വ്യക്തമാക്കി.
അന്വേഷണ സംഘത്തിന്റെ കണ്ടെത്തലിന് അനുസരിച്ചാണ് പ്രോസിക്യൂഷന് വാദിച്ചത്. ഈ കേസില് അതിജീവിത ആവശ്യപ്പെട്ടാണ് പ്രോസിക്യൂട്ടര്മാരെ നിയോഗിച്ചത്. അവരെല്ലാം നല്ല രീതിയില് പ്രവര്ത്തിച്ചിട്ടുണ്ടെന്നും മന്ത്രി വ്യക്തമാക്കി.