പാലക്കാട് കിടപ്പുരോ​ഗിക്ക് തെരുവുനായയുടെ ആക്രമണത്തിൽ ഗുരുതര പരിക്ക്. ആക്രമിച്ച നായയെ നാട്ടുകാർ തല്ലിക്കൊന്നു

പാലക്കാട്: പാലക്കാട് വടക്കഞ്ചേരിയിൽ തെരുവുനായയുടെ ആക്രമണം. തെരുവുനായയുടെ കടിയേറ്റ് കിടപ്പുരോ​ഗിക്ക് ​ഗുരുതരമായ പരിക്ക്. വടക്കഞ്ചേരി പുളിയമ്പറമ്പ് വിശാലം(55)നാണ് പരിക്കേറ്റത്.

കിടപ്പുരോ​ഗിയായ വിശാലം വീടിന്റെ മുമ്പിലെ ചായ്പ്പിൽ കട്ടിലിൽ കിടക്കുകയായിരുന്നു. ഈ സമയത്ത് പുറത്ത് നിന്ന് ഓടിയെത്തിയ നായ കയ്യിൽ കടിക്കുകയായിരുന്നു. ആക്രമണത്തിൽ കൈക്ക് ​ഗുരുതരമായ പരിക്കേറ്റു. ഇവരെ ആലത്തൂരിലെ ആശുപത്രിയിൽ പ്രവേശിപ്പിച്ചു.

ആക്രമിച്ച നായയെ നാട്ടുകാർ തല്ലിക്കൊന്നു. വിശാലത്തിനെ പരിക്കേൽപിച്ച നായ പ്രദേശത്തെ മറ്റ് പലരെയും കടിക്കാൻ ശ്രമിച്ചിരുന്നുവെന്ന് നാട്ടുകാർ വ്യക്തമാക്കി.

നായയുടെ ജഡം മണ്ണുത്തി വെറ്റിനറി സർവകലാശാലയിൽ പരിശോധനയ്ക്ക് അയച്ചിട്ടുണ്ട്. നായയ്ക്ക് പേവിഷബാധയുണ്ടോയെന്ന് പരിശോധിക്കും.