സുഹൃത്തിനൊപ്പം നെല്ലിപ്പുഴയിൽ കുളിക്കുന്നതിനിടെ ഒഴുക്കിൽപ്പെട്ട വിദ്യാർഥി മരിച്ചു

പാലക്കാട്: മണ്ണാർക്കാട് സുഹൃത്തിനൊപ്പം നെല്ലിപ്പുഴയിൽ കുളിക്കാനിറങ്ങിയ വിദ്യാർഥി മുങ്ങിമരിച്ചു. പുല്ലിശേരി സ്രാമ്പിക്കൽ മുഹമ്മദ് അശ്ഫിൻ (18) ആണ് മരിച്ചത്. 

മുക്കണ്ണത്ത് തിങ്കൾ രാവിലെ ഒമ്പതോടെയാണ് അപകടം. സുഹൃത്ത് ജോവാനൊപ്പമാണ്​ അശ്ഫിൻ പുഴയിൽ കുളിക്കാനിറങ്ങിയത്​. ഇതിനിടെ ഇരുവരും ഒഴുക്കിൽപ്പെടുകയായിരുന്നു. 

ഓടിയെത്തിയ നാട്ടുകാർ വിദ്യാർഥികളെ പുഴയിൽനിന്ന്​ കരയ്ക്കെത്തിച്ചത്​​. തുടർന്ന്​ മണ്ണാർക്കാട് ഗവ. താലൂക്ക് ആശുപത്രിയിലെത്തിച്ചെങ്കിലും അശ്ഫിന്റെ ജീവൻ രക്ഷിക്കാനായില്ല. 

നെല്ലിപ്പുഴ നജാത്ത് ആർട്സ് ആൻഡ് സയൻസ് കോളേജിലെ ഒന്നാംവർഷ ബിരുദ വിദ്യാർഥിയാണ്. തിങ്കൾ വൈകീട്ട് ഖബറടക്കം നടത്തി. ബാപ്പ: അയ്യൂബ്. ഉമ്മ:ഫരീദ.