'ദശാസന്ധിയിൽ സന്ദീപെത്തുമോ'. പാലക്കാട് മണ്ഡലത്തിൽ സന്ദീപ് വാര്യരെ മത്സരിപ്പിക്കാൻ കോൺഗ്രസിൽ ആലോചന. ബിജെപി ശക്തികേന്ദ്രത്തിൽ സന്ദീപിന് കരുത്തു കാട്ടാനാവുമെന്നും വാദം. സിപിഎം - ബിജെപി ഡീൽ ഇല്ലെങ്കിൽ വിജയം സുനിശ്ചിതമെന്നും പാർട്ടിയിൽ വിലയിരുത്തൽ

പാലക്കാട്: അടുത്ത നിയമസഭാ തിരഞ്ഞെടുപ്പിൽ പാലക്കാട് മണ്ഡലത്തിൽ സന്ദീപ് വാര്യരെ കളത്തിലിറക്കാൻ കോൺഗ്രസിൽ ആലോചന. യുവനേതാവും ഷാഫി പറമ്പിലിന്റെ പിൻമുറക്കാരനുമായ രാഹുൽ മാങ്കൂട്ടത്തിലിനെ ചുറ്റിപ്പറ്റി ഉയർന്നിട്ടുള്ള ആരോപണങ്ങൾ പാർട്ടിയെ വിഷമവൃത്തത്തിലാക്കുമ്പോഴാണ് ഇത്തരമൊരു ആലോബന പാർട്ടിക്കുള്ളിൽ സജീവമാകുന്നത്.

ഇക്കഴിഞ്ഞ പാലക്കാട് ഉപതിരഞ്ഞെടുപ്പിന് തൊട്ടു മുമ്പാണ് ബി.ജെ.പിയുടെ മുഖവും ശബ്ദവുമായിരുന്ന സന്ദീപ് വാര്യർ സംഘപരിവാർ ബന്ധം കൂടി ഉപക്ഷേിച്ച് കോൺഗ്രസിലെത്തിയത്. മണ്ഡലത്തിൽ സന്ദീപിനുള്ള മേൽക്കൈ പാർട്ടിക്ക് ഗുണകരമാവുമെന്നാണ് വിലയിരുത്തലുള്ളത്.

ബി.ജെ.പി ബന്ധം ഉപേക്ഷിച്ചുവെങ്കിലും പാർട്ടിയുടെ ചെറുതല്ലാത്ത വോട്ടുകൾ സമാഹരിക്കാൻ സന്ദീപിന് കഴിയുമെന്നാണ് രാഷ്ട്രീയ വിലയിരുത്തലുള്ളത്. മൂത്താൻ തറയടക്കമുള്ള പ്രദേശങ്ങളിൽ നിന്നും ഇതുവരെ കോൺഗ്രസിന് ലഭിക്കാത്ത വോട്ടുകൾ പോലും സന്ദീപാണ് സ്ഥാനാർത്ഥിയെങ്കിൽ അദ്ദേഹത്തിന് ലഭിച്ചേക്കാമെന്നതാണ് അവസ്ഥ.

സന്ദീപ് വാര്യർ പാർട്ടിയിൽ എത്തിയിട്ടും കഴിഞ്ഞ തവണ പാലക്കാട് കോർപ്പറേഷനിൽ അടക്കം എല്ലായിടത്തും കോൺഗ്രസിന് വോട്ട് വർധിക്കുന്നതാണ് കാണാൻ കഴിഞ്ഞിട്ടുള്ളത്. സി.പി.എമ്മിന്റെ വോട്ടുകളിലും നേരിയ വർധനയുണ്ടായി. എന്നാൽ ബി.ജെ.പിക്ക് വോട്ട് വർധിച്ചില്ലെന്ന് മാത്രമല്ല കുറയുകയും ചെയ്തു. 

രാഹുലിന് മുമ്പ് മൂന്നു തവണ അടുപ്പിച്ച് മണ്ഡലം നിലനിർത്തിയിരുന്ന ഷാഫി പറമ്പിൽ 2021ൽ ഇ. ശ്രീധരനിൽ നിന്നും കടുത്ത മത്സരമാണ് നേരിടേണ്ടി വന്നത്. അന്ന് സി.പി.എം സ്ഥാനാർത്ഥിയായിരുന്ന സി.പി പ്രമോദ് 25 ശതമാനം വോട്ട് മാത്രമാണ് നേടിയത്.

ആ തിരഞ്ഞെടുപ്പിൽ 35ശതമാനം വോട്ടുകൾ ബി.ജെ.പിക്ക് അനുകൂലമായി പോൾ ചെയ്യപ്പെട്ടിരുന്നു. പിന്നീട് ഇക്കഴിഞ്ഞ തിരഞ്ഞെടുപ്പിൽ രാഹുൽ സ്ഥാനാർത്ഥിയായതോടെ ബി.ജെ.പിയുടെയും സി.പി.എമ്മിന്റെയും വോട്ടുകളിൽ കാര്യമായ ചേർച്ചയാണ് അനുഭവപ്പെട്ടത്.

തിരഞ്ഞെടുപ്പിന് തൊട്ട് മുമ്പ് കോൺഗ്രസിന്റെ സോഷ്യൽ മീഡിയ കൈകാര്യം ചെയ്തിരുന്ന ഡോ. പി.സരിൻ പാർട്ടി വിട്ട് സി.പി.എമ്മിൽ ചേക്കേറിയതടക്കം നിരവധി വെല്ലുവിളികൾ കോൺഗ്രസിന് നേരിടേണ്ടി വന്നു. സരിനൊപ്പം എ.കെ ഷാനിബും പാർട്ടി വിട്ടിരുന്നു. 

തുടർന്ന് സരിൻ സി.പി.എമ്മിന്റെ സ്ഥാനാർത്ഥി കൂടി ആയതോടെ ഇടതുപക്ഷം പൂർണ്ണ പ്രതീക്ഷയിലായിരുന്നു. എന്നാൽ പാലക്കാട്ടെ കെട്ടുറപ്പുള്ള കോൺഗ്രസിന്റെ സംവിധാനം തിരഞ്ഞെടുപ്പു പ്രവർത്തനതത്തിൽ അരയും തലയും മുറുക്കി രംഗത്തെത്തിയതോടെ ചരിത്രത്തിലെ വലിയ ഭൂരിപക്ഷത്തിനാണ് രാഹുൽ ജയിച്ചു കയറിയത്.

പോൾ ചെയ്യപ്പെട്ട വോട്ടുകളുടെ 42.27 ശതമാനവും രാഹുൽ പെട്ടിയിലാക്കി. ബി.ജെ.പി 28ശതമാനം വോട്ട് പിടിച്ചപ്പോൾ സി.പി.എം 24 ശതമാനത്തിലേക്ക് കൂപ്പുകുത്തി. രാഹുലിനെതിരെ ആരോപണം വന്നുവെങ്കിലും ഇതുവരെ പാലക്കാടിനെ ഇത് ബാധിച്ചിട്ടില്ലെന്നതാണ് പാർട്ടി വിലയിരുത്തൽ. 

കോൺഗ്രസിന് ഉണ്ടായിട്ടുള്ള വോട്ട് വർധന അതേ തരത്തിൽ നിലനിർത്താൻ സന്ദീപ് വാര്യർക്ക് ആവുമെന്നും ഇതിന് പുറമേ കൂടുതൽ ബി.ജെ.പി വോട്ടുകൾ പാർട്ടിയുടെ പെട്ടിയിൽ വീഴുമെന്നുമാണ് കരുതപ്പെടുന്നത്. അടുത്ത തവണയെങ്കിലും യുവനേതാക്കളെ കളത്തിലിറക്കി മണ്ഡലം പിടിക്കാമെന്ന സി.പി.എമ്മിന്റെ സ്വപ്‌നം അൽപായുസ് മാത്രമാണെന്നും രാഷ്ട്രീയ നിരീക്ഷകർ കരുതുന്നു.