റാന്നി: വിജ്ഞാന റാന്നിക്ക് വഴികാട്ടാൻ വിശ്വപൗരൻ ശശി തരൂർ എത്തുന്നു. അഡ്വ. പ്രമോദ് നാരായൺ എംഎൽഎ ആവിഷ്ക്കരിച്ച് നടപ്പാക്കുന്ന റാന്നി നോളജ് വില്ലേജ് പദ്ധതിയുടെ ഭാഗമായുള്ള പാത്ത് ഫൈൻഡർ 2025 ഉദ്ഘാടനം ചെയ്യാനാണ് അദ്ദേഹം എത്തുന്നത്.
ജനുവരി16ന് രാവിലെ 11ന് റാന്നി എസ് സി ഹയർസെക്കൻഡറി സ്കൂളിൽ വച്ചാണ് ഉദ്ഘാടന കര്മ്മം നിര്വ്വഹിക്കുന്നത്.
റാന്നി നിയോജകമണ്ഡലത്തിലെ വിദ്യാഭ്യാസ മേഖലയുടെ സമഗ്ര പുരോഗതിക്കായി ആവിഷ്ക്കരിച്ച് നടപ്പാക്കുന്ന പദ്ധതിയാണ് റാന്നി നോളജ് വില്ലേജ്.
അംഗണവാടി മുതൽ ഉന്നത വിദ്യാഭ്യാസരംഗം വരെ പദ്ധതിയിൽ ഉൾപ്പെടുത്തിയിട്ടുണ്ട്. മീറ്റ് ദ മാസ്റ്റേഴ്സ്, നോളജ് അസംബ്ലി, അക്കാദമിക് വർക്ക്ഷോപ്പുകൾ, കുട്ടികൾ തയ്യാറാക്കിയ ഇ-ബുക്ക് ആവിഷ്ക്കാർ, ഇംഗ്ലീഷ് ബിനാലെ തുടങ്ങിയ നിരവധി വിദ്യാഭ്യാസ പ്രവർത്തനങ്ങളാണ് പദ്ധതിയുടെ ഒന്നാം ഘട്ടത്തിൽ നടന്നത്.
റാന്നി നിയോജകമണ്ഡലത്തിൽ നടപ്പാക്കിയ ഈ പദ്ധതി കേരളസർക്കാർ ഏറ്റെടുക്കുകയും ഇന്നവേഷൻ ഹബ്ബ് ഉൾപ്പെടെയുള്ള സ്കിൽ പാർക്ക് റാന്നിയിൽ ആരംഭിക്കുന്നതിന് സംസ്ഥാന ബജറ്റിൽ 10 കോടി രൂപയും അനുവദിച്ച് സ്ഥലം ഏറ്റെടുക്കുന്ന നടപടികൾ പൂർത്തിയായി വരുന്നു.
വിദേശ ഭാഷാ പരിശീലനത്തിനും നഴ്സിംഗ് ജോലിക്കായി സൗജന്യ റിക്രൂട്ട്മെൻ്റിനുമായി സംസ്ഥാന സർക്കാരിന്റെ സ്ഥാപനമായ ഒഡേപക് ലാംഗ്വേജ് ഇൻസ്റ്റിറ്റ്യൂട്ടും റാന്നിയിൽ പ്രവർത്തനം ആരംഭിക്കാൻ കഴിഞ്ഞത് മറ്റൊരു നേട്ടമായി.
രാജ്യത്ത് ആദ്യമായി ഒരു നിയോജകമണ്ഡലത്തിലെ എല്ലാ വിദ്യാർത്ഥികളുടേയും അഭിരുചി നിർണയിക്കുന്ന ആപ്റ്റിറ്റ്യൂട് മാപ്പിംഗ് നടത്തിയും തുടർന്ന് വിവിധ സ്കോളർഷിപ്പ് പരീക്ഷകൾക്കുള്ള മാർഗ്ഗ നിർദ്ദേശങ്ങൾ നൽകിയും സയൻസ്, കോമേഴ്സ് കോൺക്ലേവുകൾ നടത്തിയുമാണ് നോളജ് വില്ലേജ് പദ്ധതിയുടെ ഒന്നാം ഘട്ടം റാന്നിയിൽ പൂർത്തിയാക്കിയത്.
ഇതിന്റെ രണ്ടാം ഘട്ടമായാണ് പാത്ത് ഫൈൻഡർ 2025ന് തുടക്കം കുറിക്കുന്നതിനായി ശശി തരൂർ എം പി എത്തുന്നത്.
പാത്ത് ഫൈൻഡർ 2025 പദ്ധതിയിൽ വിദ്യാഭ്യാസ പ്രവർത്തനങ്ങളുടെ ഭാഗമായി നൂതന ആശയങ്ങളാണ് ഉൾക്കൊള്ളിച്ചിരിക്കുന്നത്.
കോട്ടയത്തെ കെ ആർ നാരായണൻ ഫിലിം ഇൻസ്റ്റിറ്റ്യൂട്ടും എസ്ഐടി ചേർന്ന് കുട്ടികൾക്ക് സിനിമ മീഡിയ പഠനം സാധ്യമാക്കുന്നതിന് നടപടി ആരംഭിച്ചിട്ടുണ്ട്.
നിയോജക മണ്ഡലത്തിലെ പട്ടികവർഗ്ഗ മേഖലയിൽ നിന്നുള്ള കുട്ടികളെ സമൂഹത്തിന്റെ മുഖ്യധാരയിലേക്ക് കൊണ്ടുവരുന്നതിനായി ഇത് ഉപയോഗപ്പെടുത്തും.
കൂടാതെ കൊച്ചിൻ യൂണിവേഴ്സിറ്റിയുടെ (കുസാറ്റ്) സഹകരണത്തോടെ ആർട്ടിഫിഷ്യൽ ഇൻറലിജൻസ്, നാനോ ടെക്നോളജി, റോബോട്ടിക്സ് എന്നിവയും വിദ്യാർത്ഥികളെ പരിചയപ്പെടുത്തും.
നാഷണൽ സ്കിൽ ഡെവലപ്മെൻറ് കോർപ്പറേഷൻ്റെ മോണ്ടിസോറി ടീച്ചേഴ്സ് ട്രെയിനിംഗ് സെൻറർ ഏപ്രിൽ ഒന്നുമുതൽ പ്രവർത്തനം ആരംഭിക്കും.
ഉദ്ഘാടനത്തിന് എത്തുന്ന ശശി തരൂർ വിദ്യാർത്ഥികളുമായി സംവദിക്കുന്നതിന് അവസരം ഒരുക്കിയിട്ടുണ്ട്.
റാന്നി നിയോജകമണ്ഡലത്തിലെ വിവിധ സ്കൂളുകളിൽ നിന്നും ഹൈസ്കൂൾ മുതൽ കോളേജ് തലം വരെ തിരഞ്ഞെടുക്കപ്പെട്ട വിദ്യാർത്ഥികൾക്കാണ് പരിപാടിയിൽ പങ്കെടുക്കാൻ കഴിയുക.
/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/2025/01/11/3nTrK8y3An9SLV5SKq5T.jpg)