ചിറ്റയം ​ഗോപകുമാർ എംഎൽഎ സിപിഐ പത്തനംതിട്ട ജില്ലാ സെക്രട്ടറി. നടപടിയെ തുടർന്ന് ജില്ലാ സെക്രട്ടറി സ്ഥാനത്തു നിന്നു ഒഴിവാക്കപ്പെട്ട എപി ജയൻ ജില്ലാ കമ്മിറ്റിയിലേക്ക് തിരിച്ചെത്തി

പത്തനംതിട്ട: സിപിഐ പത്തനംതിട്ട ജില്ലാ സെക്രട്ടറിയായി ചിറ്റയം ​ഗോപകുമാർ എംഎൽഎയെ തെരഞ്ഞെടുത്തു.

ജില്ലാ സമ്മേളനത്തിന്റെ ഭാഗമായി അഞ്ച് മണിക്കൂറോളം നീണ്ട ചർച്ചകൾക്കൊടുവിലാണ് ചിറ്റയത്തെ സെക്രട്ടറിയാക്കാൻ തീരുമാനിച്ചത്. 

വിഭാ​​ഗീയത രൂക്ഷമായ ജില്ലയിൽ സമവായമെന്ന നിലയിലാണ് ചിറ്റയം സെക്രട്ടറി സ്ഥാനത്തെത്തിയത്. 

നടപടി നേരിട്ട് ജില്ലാ സെക്രട്ടറി സ്ഥാനത്തു നിന്നു ഒഴിവാക്കപ്പെട്ട എപി ജയൻ ജില്ലാ കമ്മിറ്റിയിൽ തിരിച്ചെത്തി. 45 അം​ഗങ്ങളുള്ള ജില്ലാ കമ്മിറ്റിയേയും തെരഞ്ഞെടുത്തു. 

ഭാരിച്ച ഉത്തരവാദിത്വമാണ് പാർട്ടി എൽപ്പിച്ചിരിക്കുന്നത്. കൃത്യമായി കാര്യങ്ങൾ നിറവേറ്റും. ജില്ലയിലെ പ്രശ്നങ്ങളെല്ലാം പരിഹരിക്കുമെന്നും ചിറ്റയം പുതിയ സ്ഥാനത്തെക്കുറിച്ച് പ്രതികരിച്ചു.

ജില്ലയിലെ ഒരു വിഭാ​ഗത്തിന്റെ ശക്തമായ എതിർപ്പ് കാര്യമാക്കാതെയാണ് ജയനെ ജില്ലാ കമ്മിറ്റിയിൽ തിരിച്ചെടുക്കാനുള്ള തീരുമാനം. സംസ്ഥാന നേതൃത്വത്തിന്റെ പിന്തുണയിലാണ് അദ്ദേഹം കമ്മിറ്റിയിൽ തിരിച്ചെത്തിയത്. 

പാർട്ടി നടപടിയെടുത്തപ്പോൾ ഏറെ വിഷമിച്ചെന്നും തിരിച്ചെത്തിയതിൽ സന്തോഷമുണ്ടെന്നും ജയൻ വ്യക്തമാക്കി.