അന്ത്യയാത്രാ ചടങ്ങുകളിലെ വൈവിധ്യം വിളിച്ചോതുന്ന ഫോട്ടോ പ്രദര്‍ശനത്തിന് തുടക്കമായി

പ്രദര്‍ശനോദ്ഘാടനം ചലച്ചിത്ര സംവിധായകന്‍ അടൂര്‍ ഗോപാലകൃഷ്ണന്‍ നിര്‍വഹിച്ചു. അന്ത്യയാത്രകളെ ഭയത്തോടെ കാണുന്നതിന് പകരം ആഘോഷിക്കപ്പെടേണ്ട വസ്തുതയായി കരുതാനാകണമെന്ന് അദ്ദേഹം പറഞ്ഞു. അതുകൊണ്ടു തന്നെ വ്യത്യസ്തമായ ആശയത്തിലൂന്നിയുള്ള മിഖായേല്‍ ഗ്ലൈഹിന്‍റെ ഫോട്ടോകള്‍ ശ്രദ്ധേയമാണ്.  800 വര്‍ഷം മുന്‍പാണ് മൃതശരീരങ്ങളെ ദഹിപ്പിക്കുന്ന സമ്പ്രദായം ഇന്ത്യന്‍ സംസ്കാരത്തിന്‍റെ ഭാഗമായത്. നമ്മുടെ സംസ്ക്കാരം അനുസരിച്ച് മരിച്ചയാളുടെ ശരീരത്തെ ദഹിപ്പിച്ചാലും തുടര്‍ന്ന് ധാരാളം ആചാരച്ചടങ്ങുകള്‍ അവശേഷിക്കുന്നു. ഇത്തരം ചടങ്ങുകള്‍ മരിച്ചയാള്‍ക്ക് വേണ്ടിയല്ലെന്നും മരണത്തില്‍ ദു:ഖാര്‍ത്തരായ പ്രിയപ്പെട്ടവരുടെ ആശ്വാസത്തിന് വേണ്ടിയാണെന്നും അദ്ദേഹം കൂട്ടിച്ചേര്‍ത്തു.

ചടങ്ങില്‍ മിഖായേല്‍ ഗ്ലൈഹ് പങ്കെടുത്തു. ജീവിതത്തിലെ ഓരോ നിമിഷവും ആസ്വദിക്കാനും മൈന്‍ഡ് ഫുള്‍നെസ് അനുഭവിക്കാനും അന്ത്യയാത്രാ ചടങ്ങുകളിലെ ഫോട്ടോകള്‍ പകര്‍ത്തുന്നതിലൂടെ സാധിക്കുന്നതായി മിഖായേല്‍ ഗ്ലൈഹ് പറഞ്ഞു. വിവിധ നാടുകളിലെ അന്ത്യയാത്രാ ചടങ്ങുകളിലെ രൂപങ്ങള്‍, ചിഹ്നങ്ങള്‍, ആചാരങ്ങള്‍ എന്നിവയില്‍ മാത്രമാണ് വ്യത്യസ്ഥതയുള്ളത്. വൈകാരികത എല്ലായിടത്തും ഒന്നുതന്നെയാണ്. അന്ത്യയാത്രാ ചടങ്ങുകളിലെ വൈവിധ്യം നേരിട്ടു കാണുന്നതിലും ഫ്രെയിമിലാക്കുന്നതിലും ശ്രദ്ധ കേന്ദ്രീകരിക്കുന്ന തനിക്ക് ശ്മശാനങ്ങള്‍ നിശബ്ദതയുടെയും സ്നേഹസ്മരണയുടെയും സ്ഥലങ്ങളാണ്. പലപ്പോഴും ഇവ മരുപ്പച്ചകളാണ്. കേരളത്തില്‍ ഫോട്ടോപ്രദര്‍ശനത്തിന് അവസരമൊരുക്കിയ ഗൊയ്ഥെ സെന്‍ട്രത്തോട് കടപ്പാടുണ്ടെന്നും അദ്ദേഹം കൂട്ടിച്ചേര്‍ത്തു.

ഫെഡറല്‍ റിപ്പബ്ളിക് ഓഫ് ജര്‍മ്മനിയിലെ ഓണററി കോണ്‍സല്‍ ഡോ.സയ്യിദ് ഇബ്രാഹിം സ്വാഗതം ആശംസിച്ചു. ജീവിതാവസാനത്തെ മിഖായേല്‍ ഗ്ലൈഹ് നോക്കിക്കാണുന്ന രീതി വളരെ പ്രചോദനാത്മകമാണെന്ന് അദ്ദേഹം പറഞ്ഞു. മിഖായേല്‍ ഗ്ലൈഹുമായി തനിക്ക് 33 വര്‍ഷക്കാലമുള്ള സൗഹൃദമുണ്ട്. അദ്ദേഹത്തിന്‍റെ മികച്ച ചിത്രങ്ങള്‍ പ്രദര്‍ശിപ്പിക്കാന്‍ ഏറ്റവും അനുയോജ്യമായ ഇടമാണ് തലസ്ഥാനനഗരിയില്‍ ഒരുക്കിയിട്ടുള്ളതെന്നും അദ്ദേഹം കൂട്ടിച്ചേര്‍ത്തു.

ഹിന്ദു, ജൂത, മുസ്ലീം, ക്രിസ്ത്യന്‍, ചൈനീസ് സമൂഹങ്ങളുടെ അന്ത്യയാത്രാ പാരമ്പര്യങ്ങളിലേക്ക് കടന്നു ചെല്ലാന്‍ ഫോട്ടോ പ്രദര്‍ശനം അവസരമൊരുക്കും. സ്നേഹ-ദു:ഖ സാന്ദ്രമായ അന്ത്യയാത്രാ ചടങ്ങുകള്‍,  സെമിത്തേരികള്‍, മതപരമായ ചിഹ്നങ്ങള്‍, ആചാരങ്ങള്‍ തുടങ്ങിയവയുമായി ബന്ധപ്പെട്ട ഫോട്ടോകള്‍ പ്രദര്‍ശനത്തെ വേറിട്ടതാക്കുന്നു. മരിച്ചവരോടുള്ള ആദരവ് കലാപരമായ സംഭാവനയായി തിരിച്ചറിയപ്പെടുന്നതിനും പ്രദര്‍ശനം സഹായകമാണ്.

മലേഷ്യ, ദക്ഷിണാഫ്രിക്ക, ലെബനന്‍, ടുണീഷ്യ, റുവാണ്ട, യുകെ, ഫ്രാന്‍സ്, ഓസ്ട്രിയ, ജര്‍മ്മനി എന്നീ രാജ്യങ്ങളില്‍ നിന്നുള്ള ഫോട്ടോകള്‍ക്കൊപ്പം കേരളത്തില്‍ നിന്ന് പകര്‍ത്തിയ ചിത്രങ്ങളും അദ്ദേഹത്തിന്‍റെ പ്രദര്‍ശനത്തിലുണ്ട്. പൊതുജനങ്ങളും കലാകാരډാരും പ്രദര്‍ശനം കാണാനെത്തിയിരുന്നു. കാണികള്‍ക്ക് മിഖായേല്‍ ഗ്ലൈഹിനോട് സംവദിക്കാനുള്ള അവസരം ലഭിച്ചു.

സ്വദേശത്തും വിദേശത്തുമുള്ള മാധ്യമപ്രവര്‍ത്തകര്‍, ജേണലിസം സ്കൂളുകള്‍ എന്നിവരുമായി ചേര്‍ന്ന് പ്രവര്‍ത്തിച്ചിട്ടുള്ള മിഖായേല്‍ ഗ്ലൈഹ് ,നെഗറ്റീവ് വാര്‍ത്തകളും അക്രമവും വാര്‍ത്തയാക്കുന്നതില്‍ നിയന്ത്രണം വേണമെന്ന അഭിപ്രായക്കാരനാണ്. ഇത്തരം സമീപനത്തിലൂടെ സാമൂഹിക മാറ്റത്തിന് പത്രപ്രവര്‍ത്തനം ഒരു പോസിറ്റീവ് ശക്തിയായി മാറുമെന്നും അദ്ദേഹം കരുതുന്നു.

നവംബര്‍ 8 വരെ നീളുന്ന പ്രദര്‍ശനത്തിലേക്കുള്ള പ്രവേശനം സൗജന്യമാണ്.