തെരഞ്ഞെടുപ്പിന് മുന്നോടിയായി എംഎൽഎമാർക്ക് മുഖ്യമന്ത്രിയുടെ മുന്നറിയിപ്പ്. നിങ്ങളിൽ ചിലർ മത്സരിച്ചേക്കാം, ചിലർ മത്സരിച്ചേക്കില്ല. എന്നാലത് ഇപ്പോഴത്തെ പ്രവർത്തനങ്ങളെ ഒരു തരത്തിലും ബാധിക്കാൻ പാടില്ലെന്ന് നിർദേശം. സ്ഥാനാർത്ഥിത്വം നോക്കി നിൽക്കാതെ സഭയിലും മണ്ഡലങ്ങളിലും എം.എൽ.എമാർ സജീവമാകണമെന്ന് മുഖ്യമന്ത്രി. അവസാന നിമിഷം വരെ ഭരണ–രാഷ്ട്രീയ വിശ്വാസ്യത ഉറപ്പിക്കാൻ എൽ.ഡി.എഫ് തന്ത്രം

തിരുവനന്തപുരം: നിയമസഭാ നടപടികളിലും മണ്ഡലത്തിലെ പ്രവർത്തനങ്ങളിലും എം.എൽ.എമാർ കൂടുതൽ ജാഗ്രത പുലർത്തണമെന്നും സജീവമാകണമെന്നും മുഖ്യമന്ത്രി പിണറായി വിജയൻ.

വരാനിരിക്കുന്ന നിയമസഭാ തിരഞ്ഞെടുപ്പിലെ സ്ഥാനാർത്ഥിത്വത്തെക്കുറിച്ച് ആലോചിച്ച് ഇപ്പോഴത്തെ പ്രവർത്തനങ്ങളിൽ വീഴ്ച വരുത്തരുതെന്ന് അദ്ദേഹം മുന്നറിയിപ്പ് നൽകി.

എൽ.ഡി.എഫിൻ്റെ നിയമസഭാ കക്ഷി യോഗത്തിലാണ് മുഖ്യമന്ത്രി എം.എൽ.എമാർക്ക് കൃത്യമായ നിർദ്ദേശങ്ങൾ നൽകിയത്.

നിയമസഭയിൽ ചർച്ചകൾ നടക്കുമ്പോൾ എം.എൽ.എമാർ സഭയിൽ തന്നെ ഉണ്ടാകണമെന്ന് മുഖ്യമന്ത്രി നിർദ്ദേശിച്ചു. പലപ്പോഴും ചർച്ചകൾ നടക്കുമ്പോൾ അംഗങ്ങൾ സഭയിലുണ്ടാകാത്ത സാഹചര്യം ഒഴിവാക്കണം.

ഈ സഭയുടെ അവസാന സമ്മേളനമായതിനാൽ ഓരോ നിമിഷവും ഗൗരവത്തോടെ കാണണമെന്നും സഭാ നടപടികളിൽ സജീവമായി ഇടപെടണമെന്നും അദ്ദേഹം പറഞ്ഞു.

സർക്കാരിന്റെ നേട്ടങ്ങളും ജനക്ഷേമ പ്രവർത്തനങ്ങളും സഭയിൽ കൃത്യമായി അവതരിപ്പിക്കാൻ അംഗങ്ങൾക്ക് സാധിക്കണമെന്നാണ് മുഖ്യമന്ത്രിയുടെ നിലപാട്.

ഗവർണറുടെ നയപ്രഖ്യാപന പ്രസംഗത്തിന് നന്ദി രേഖപ്പെടുത്തി കൊണ്ടുള്ള പ്രമേയത്തിന്മേൽ നടക്കുന്ന ചർച്ചയും ബജറ്റ് അവതരണത്തിനു മേൽ നടക്കുന്ന ചർച്ചയിലും സജീവമായി ഇടപെടണമെന്നും മുഖ്യമന്ത്രി നിർദ്ദേശിച്ചു.
സർക്കാരിന്റെ പത്തു കൊല്ലത്തെ വികസന നേട്ടങ്ങൾ ചർച്ചയിൽ പങ്കെടുത്തുകൊണ്ട് അവതരിപ്പിക്കണം.

അതിനൊപ്പം പത്തുകൊല്ലം മുമ്പ് കേരളത്തിൻറെ അവസ്ഥ എന്തായിരുന്നു എന്നുകൂടി പരാമർശിക്കണമെന്നും മുഖ്യമന്ത്രി ഓർമിപ്പിച്ചു.

തിരഞ്ഞെടുപ്പ് അടുത്തിരിക്കുന്ന സാഹചര്യത്തിൽ മണ്ഡലങ്ങളിൽ ആര് മത്സരിക്കും എന്നതിനെച്ചൊല്ലിയുള്ള ചർച്ചകൾക്ക് ഇപ്പോൾ പ്രസക്തിയില്ലെന്ന് മുഖ്യമന്ത്രി വ്യക്തമാക്കി"നിങ്ങളിൽ ചിലർ വരാനിരിക്കുന്ന തിരഞ്ഞെടുപ്പിൽ മത്സരിച്ചേക്കാം, ചിലർ മത്സരിച്ചേക്കില്ല.  

എന്നാൽ അത് ഇപ്പോഴത്തെ പ്രവർത്തനങ്ങളെ ഒരു തരത്തിലും ബാധിക്കാൻ പാടില്ല. നിങ്ങൾ ഇപ്പോഴും ജനപ്രതിനിധിയാണ്.

ആ ഉത്തരവാദിത്വങ്ങൾ തുടർന്നും നിർവഹിക്കണം" മുഖ്യമന്ത്രി നിർദ്ദേശിച്ചു മണ്ഡലത്തിൽ ആര് സ്ഥാനാർത്ഥിയാകും എന്ന് നോക്കി നിൽക്കാതെ, ജനങ്ങൾക്കിടയിൽ സജീവമായി പ്രവർത്തിക്കാനാണ് അദ്ദേഹം ആവശ്യപ്പെട്ടത്. 

നിലവിലെ എം.എൽ.എമാർ തങ്ങളുടെ ഉത്തരവാദിത്തങ്ങളിൽ നിന്ന് പിന്നോട്ട് പോകുന്നത് പാർട്ടിക്ക് ഗുണകരമാകില്ലെന്ന സൂചനയും അദ്ദേഹം നൽകി.​നിയമസഭയിലെ സാന്നിധ്യം പോലെ തന്നെ പ്രധാനമാണ് മണ്ഡലങ്ങളിലെ ഇടപെടലുകളെന്നും മുഖ്യമന്ത്രി ഓർമ്മിപ്പിച്ചു.

വികസന പ്രവർത്തനങ്ങൾ പൂർത്തിയാക്കുന്നതിലും ജനങ്ങളുടെ പരാതികൾ പരിഹരിക്കുന്നതിലും എം.എൽ.എമാർ മുൻപന്തിയിൽ നിൽക്കണം. തിരഞ്ഞെടുപ്പ് രാഷ്ട്രീയത്തിലേക്ക് കടക്കുന്നതിന് മുൻപ് തന്നെ ജനങ്ങളുമായുള്ള ബന്ധം ശക്തമാക്കാൻ താഴെത്തട്ടിലുള്ള പ്രവർത്തനങ്ങൾ ഊർജ്ജിതമാക്കാനാണ് നിർദ്ദേശം.

നിയമസഭാ തിരഞ്ഞെടുപ്പിന് മുന്നോടിയായി ഭരണകക്ഷി അംഗങ്ങളെ കൂടുതൽ സജ്ജരാക്കുക എന്ന ലക്ഷ്യത്തോടെയാണ് മുഖ്യമന്ത്രി നിയമസഭാ കക്ഷി യോഗത്തിൽ ഇത്തരമൊരു നിലപാട് സ്വീകരിച്ചത്.

​മുഖ്യമന്ത്രി നൽകിയ നിർദ്ദേശങ്ങൾക്ക് കേവലം അച്ചടക്ക നടപടികൾക്ക് അപ്പുറം വലിയ രാഷ്ട്രീയ പ്രസക്തിയുള്ളതാണ്. തിരഞ്ഞെടുപ്പ് അടുത്തിരിക്കുന്ന സാഹചര്യത്തിൽ എൽ.ഡി.എഫിന്  ഈ നീക്കം പല വിധത്തിൽ ഗുണം ചെയ്യും.

​തിരഞ്ഞെടുപ്പ് കാലത്ത് സ്വാഭാവികമായും ഉണ്ടാകാൻ ഇടയുള്ള ഭരണവിരുദ്ധ വികാരത്തെ പ്രതിരോധിക്കാൻ എം.എൽ.എമാർ സഭയിലും മണ്ഡലത്തിലും സജീവമാകേണ്ടത് അനിവാര്യമാണ്.

സഭയിലെ ചർച്ചകളിൽ സജീവമായി പങ്കെടുക്കുന്നതിലൂടെ സർക്കാരിന്റെ വികസന നേട്ടങ്ങൾ ജനങ്ങളിലേക്ക് എത്തിക്കാനും പ്രതിപക്ഷ ആരോപണങ്ങളുടെ മൂർച്ച കുറയ്ക്കാനും സാധിക്കും.

സീറ്റ് ലഭിക്കുമോ ഇല്ലയോ എന്ന ആശങ്ക എം.എൽ.എമാരുടെ പ്രവർത്തനത്തെ മന്ദീഭവിപ്പിക്കാൻ സാധ്യതയുണ്ട്. "ആര് മത്സരിക്കുമെന്ന് ഇപ്പോൾ നോക്കേണ്ട" എന്ന മുഖ്യമന്ത്രിയുടെ നിലപാട്, എം.എ.എൽമാരെ അവരുടെ നിലവിലെ ഉത്തരവാദിത്തങ്ങളിൽ ശ്രദ്ധ കേന്ദ്രീകരിക്കാൻ പ്രേരിപ്പിക്കും. ഇത് അവസാന നിമിഷം വരെ മണ്ഡലങ്ങളിൽ വികസന പ്രവർത്തനങ്ങൾ തടസ്സമില്ലാതെ നടക്കാൻ സഹായിക്കും.
​

എം.എൽ.എമാർ മണ്ഡലത്തിൽ സജീവമാകുമ്പോൾ അത് പ്രാദേശിക പാർട്ടി പ്രവർത്തകർക്ക് വലിയ ആവേശം നൽകും. സ്ഥാനാർത്ഥി നിർണ്ണയത്തെക്കുറിച്ചുള്ള ചർച്ചകൾ മാറ്റിനിർത്തി പ്രവർത്തനത്തിന് മുൻഗണന നൽകുന്നത് വഴി താഴെത്തട്ടിലുള്ള സംഘടനാ സംവിധാനത്തെ തിരഞ്ഞെടുപ്പിന് സജ്ജമാക്കാൻ എൽ.ഡി.എഫിന് സാധിക്കും.

സഭയുടെ അവസാന സമ്മേളനത്തെ ഗൗരവത്തോടെ കാണണമെന്ന നിർദ്ദേശം സർക്കാരിന്റെ പക്വതയാണ് കാണിക്കുന്നത്. ജനകീയ പ്രശ്നങ്ങൾ സഭയിൽ ചർച്ച ചെയ്യപ്പെടുന്നുണ്ടെന്ന് ഉറപ്പാക്കുന്നത് വഴി സർക്കാരിന്റെ പ്രതിച്ഛായ വർദ്ധിപ്പിക്കാൻ എൽ.ഡി.എഫിന് കഴിയും.

ചിലർ മത്സരിച്ചേക്കില്ല എന്ന് മുഖ്യമന്ത്രി സൂചിപ്പിച്ചത് വഴി, പുതുമുഖങ്ങളെ കൊണ്ടുവരാനുള്ള സാധ്യത അദ്ദേഹം തുറന്നിട്ടിരിക്കുകയാണ്.

നിലവിലെ എം.എൽ.എമാർ മണ്ഡലത്തിൽ സജീവമായി പ്രവർത്തിച്ചാൽ, അവിടെ പുതിയ സ്ഥാനാർത്ഥി വന്നാലും വിജയം ഉറപ്പിക്കാൻ ആവശ്യമായ അനുകൂല സാഹചര്യം  നേരത്തെ തന്നെ ഒരുക്കാൻ സാധിക്കും.

ചുരുക്കത്തിൽ  എം.എൽ.എമാരുടെ പ്രവർത്തനക്ഷമത വർദ്ധിപ്പിക്കുന്നതിലൂടെ സർക്കാരിന്റെയും മുന്നണിയുടെയും വിശ്വാസ്യത ജനങ്ങൾക്കിടയിൽ ഊട്ടിയുറപ്പിക്കാനാണ് മുഖ്യമന്ത്രി ലക്ഷ്യമിടുന്നത്.